लगातारकाे वर्षाका कारण नारायणगढ–मुग्लिन सडकखण्डकाे विभिन्न स्थानमा पहिरो खस्दा सडक पूर्ण रूपमा अवरुद्ध भएको छ । उक्त सडकखण्ड अवरुद्ध हुँदा यातयात सञ्चालन हुन नसक्ने भएकाले सबै प्रकारका सवारीसाधन आवागमनमा पूर्ण रुपमा राेक लगाइएको छ ।
जिल्ला प्रशासन कार्यालय चितवनले हिजाे सँझ एक सूचना जारी गर्दै अर्को सूचना जारी नभएसम्मका लागि उक्त सडकखण्ड हुँदै सञ्चालन हुने सबै प्रकारका सवारीसाधनको आवागमन राेक लगाएकाे हाे ।
प्रशासनले काठमाडौं उपत्यकाबाट बाहिरिने यातयातलाई यात्रा नगर्न तथा रुपन्देही, नवलपरासीलगायत पश्चिम क्षेत्रबाट काठमाडौंतर्फ आउँदै गरेका यात्रुहरूलाई चितवनभन्दा अगाडि नबढ्न सूचना मार्फत आग्रह गरेको हाे ।
भारी वर्षा र पहिरोका कारण सडक अवरुद्ध भएकाे र सडक खुलाउन कठिन भइरहेकाले प्रशासनले उक्त आग्रह गरेको हाे । यात्रुहरूलाई सूचनाको पालना गर्न र यात्रा गर्दा झोलामा खानेपानी, सुक्खा खाना, प्राथमिक उपचारका औषधि, अतिरिक्त लुगा तथा मोबाइल चार्जरजस्ता अत्यावश्यक सामग्री साथमा राख्न पनि सूचना मार्फत आग्रह गरिएको छ ।
