अविरल वर्षाका कारण पर्वत, स्याङ्जा र गुल्मी जिल्लाको संगमस्थलमा रहेको विश्वकै ठूलो शालिग्राम शिला डुबानमा परेको छ । पछिल्लाे दुई दिनदेखि लगातार परेको वर्षाका कारण कालीगण्डकी नदी र सेती खोलाको जलसतह बढेपछि शालिग्राम शिला डुबानमा परेको हो ।
शालिग्राम विद्याश्रमका संरक्षक कुलराज तिवारीका अनुसार शिलामा जाने बाटो, नजिकै रहेको सत्तल समेत डुबेकाे बताइएकाे छ । निरन्तर वर्षाका कारण कालीगण्डकी र सेती खोलामा पानीको सतह ह्वात्तै बढेपछि कालीगण्डकीमा पानीकाे बहाव बढेपछि शालिग्राम शिला डुबानमा परेको हो ।
शिला डुबानमा परेसँगै उक्त क्षेत्रमा कार्यरत पुजारी तथा पण्डित विस्थापित बनेका छन् भने नियमित पूजापाठ र दर्शन गर्न आउने भक्तजन पनि शालिग्राम शिलाको दर्शन गर्नबाट वञ्चित भएका छन् । सेती वेणीमा मिसिने सेती खोलाको बहाव र कालीगण्डकीको उच्च बहावका कारण शिला परिक्रमास्थलसमेत पूर्णरूपमा क्षतविक्षत बनेकाे छ ।
पवित्र शालिग्राम शिलासँगै शालिग्राम क्षेत्रका सत्तललगायतका सबै संरचना डुबानमा परेका छन् । शिला संरक्षणका लागि बनाइएको तटबन्ध र ग्याबियन जालीसमेत पानीले पुरिएपछि शिलामा दर्शन गर्न जान रोक लगाइएको छ । कालीगण्डकी ‘ए’ जलविद्युत् आयोजनाको बाँधका कारण बाढी आउँदा पर्वत, स्याङ्जा र गुल्मी जिल्लाको सीमामा पर्ने सेती वेणी बजार डुबानको जोखिममा पर्ने गरेको छ ।
जिल्ला प्रहरी कार्यालय पर्वतले लगातारको वर्षासँगै सेती वेणी क्षेत्रलगायत विभिन्न खोला तथा नदीमा बाढी पहिरोको जोखिम रहेकाले आवश्यक सुरक्षा सतर्कता अपनाउन आग्रह गरेको छ ।
