आजदेखि भरी सिलिण्डर ग्यास पाइने भएको छ । नेपाल आयल निगमले हिजाे प्रेस विज्ञप्ति जारी गर्दै भरी सिलिण्डर बिक्री वितरणको व्यवस्था मिलाइएको जानकारी दिएको हो ।
अहिले इन्डियन आयल कर्पोरेसनका विभिन्न बोटलिङ प्लान्ट तथा रिफाइनरीहरूबाट ग्यास लोडिङमा सुधार आएपछि निगमले यो व्यवस्था लागू गरेको हो । निगमका अनुसार उपभोक्ताले १४.२ केजीको ग्यासको मूल्य भने २ हजार ६० रुपैयाँ तिर्नुपर्ने विज्ञप्तिमा उल्लेख छ ।
यसअघि ग्यास आपूर्ति प्रणालीलाई व्यवस्थित बनाउन निगमले २९ फागुनबाट आधा सिलिन्डर ७.१ केजी मात्र ग्यास भरी बिक्री गर्ने निर्णय गरेको थियो । उद्योग, वाणिज्य तथा आपूर्ति मन्त्री गौरीकुमारी यादवको विशेष निर्देशनपछि निगमले भरी सिलिण्डर बिक्री वितरणको व्यवस्था मिलाएको हो ।
नियमित रूपमा एलपी ग्यास आयात भइरहेकाले उपभोक्ताहरूलाई आवश्यकता अनुसार मात्र ग्यास खरिद गर्न र अनावश्यक भण्डारण नगर्न समेत निगमले अनुरोध गरेको छ ।
