नेपाली सेफ भवी खनालले पाककलाको क्षेत्रमा १६ वर्षभन्दा बढी अनुभवसहित फाइन डाइनिङ, ग्यास्ट्रोनोमी र दिगो अन्तर्राष्ट्रिय स्तरको पहिचान स्थापित गरेका छन् । एक्जिक्युटिभ सेफ, कुलिनरी डाइरेक्टर तथा सेफ कन्सल्टेन्टका रूपमा उनले विभिन्न प्रतिष्ठित रिसोर्ट तथा रेस्टुरेन्टमा नेतृत्वदायी भूमिका निर्वाह गर्दै मेनु विकास, किचन व्यवस्थापन, खाद्य गुणस्तर, लागत नियन्त्रण र सेवा उत्कृष्टतामा योगदान दिएका हुन् ।
नेपाल कुलिनरी कलेजबाट पाककलाको अध्ययन सुरु गरेका खनालले होटल व्यवस्थापन तथा नेतृत्वमा स्नातक र एमबीएसमेत पूरा गरेका छन् । स्थानीय सामग्री, परम्परागत स्वाद र आधुनिक अन्तर्राष्ट्रिय पाकशैलीलाई संयोजन गर्दै उनले सिर्जना गरेकाे परिकार स्वाद, प्रस्तुति गुणस्तरका दृष्टिले विशिष्ट मानिन्छ ।
उनी पाककलाका दक्ष सेफ मात्र नभई युवा सेफहरूको सीप विकास, प्रशिक्षण र नेतृत्वमा पनि सक्रिय रहेका छन् । दिगो पाककला, फ्युजन कुलिनरी, ग्यास्ट्रोनोमी र खाद्य नवप्रवर्तनलाई प्राथमिकतामा राख्दै उनले नेपाली आतिथ्य उद्योगलाई अन्तर्राष्ट्रिय स्तरमा प्रवर्द्धन गर्ने प्रयास गरिरहेकाे बताइएकाे छ ।
नेपालको पहिलो खाद्य शब्दकोश ‘फलाङ फुड डिक्सनरी’का लेखक शिव न्यौपानेले भवी खनालजस्ता दक्ष नेपाली सेफहरूको अनुभव र योगदानलाई राज्यले उचित सम्मान र प्रोत्साहन गर्नुपर्ने बताउँछन् । यस्ता जनशक्तिले नेपालको पर्यटन, आतिथ्य उद्योग र नेपाली खानाको अन्तर्राष्ट्रिय प्रवर्द्धनमा महत्वपूर्ण भूमिका खेल्न सक्ने उनकाे भनाइ रहेकाे छ ।
सेफ खनालले ग्यास्ट्रोनोमी केवल खाना पकाउने कला मात्र नभई संस्कृति, स्वाद र मानिसहरूलाई एकै ठाउँमा जोड्ने माध्यम भएकाे बताएका छन् । निरन्तर अध्ययन, अनुशासन र सिर्जनशीलतालाई सफलताको आधार मान्ने उनी आधुनिक पाककलामार्फत नेपालको पहिचान विश्वमञ्चमा स्थापित गर्ने लक्ष्यका साथ अघि बढिरहेका छन् ।
