ट्राफिक नियम उलंधन गर्ने सवारीसाधन र चालकमाथि कडा निगरानी थालिएकाे छ । काठमाडौं उपत्यकामा ट्राफिक प्रहरीले सवारी नियम उलंधन गर्ने माथि निगरानी बढाएको हाे ।
ट्राफिक प्रहरीले पछिल्लो २४ घण्टामा उपत्यकाका विभिन्न स्थानमा सञ्चालन गरिएको विशेष चेक जाँचका क्रममा १ हजार २०९ वटा सवारीसाधनका चालकलाई कारबाही गरेकाे छ । काठमाडौँ उपत्यका ट्राफिक प्रहरी कार्यालयका अनुसार आज बिहानसम्ममा सबैभन्दा बढी तीव्र गतिमा सवारी चलाउने १४३ जना र मादक पदार्थ सेवन (मापसे) गरी सवारी सञ्चालन गर्ने ९६ जना चालकलाई कारबाही गरिएको छ ।
त्यसैगरि नियमविपरीत राइड सेयरिङ गर्ने ५० जना, रातो बत्ती (रेड लाइट) उल्लङ्घन गर्ने ५१ जना र निषेधित क्षेत्रमा हर्न बजाउने ५६ जना चालक कारबाहीमा परेका छन् । त्यस्तै सवारीको यान्त्रिक अवस्था ठीक नभएका ४३, एकतर्फी सडकमा सवारी चलाउने २५ जना र लेन अनुशासन उल्लंघन गर्ने २१ जना चालकलाई नियन्त्रणमा लिई कारबाही गरिएको कार्यालयले जनाएकाे छ ।
कार्यालयका अनुसार अन्य विभिन्न ट्राफिक कसुरमा ७२४ जना चालक कारबाहीमा परेको बताइएको छ । ट्राफिक प्रहरीले सडक दुर्घटना न्यूनीकरण र सवारी आवागमनलाई व्यवस्थित बनाउन उपत्यकामा नियमित तथा आकस्मिक चेकिङलाई निरन्तरता दिइएको छ ।
