नेपालको पहिलो आधुनिक यातायात सुरुङमार्ग ‘नागढुङ्गा–सिस्नेखोला सुरुङमार्ग’ भाेलि औपचारिक उद्घाटन गरिँदै छ । जापान अन्तर्राष्ट्रिय सहयोग नियोग (जाइका) को सहुलियतपूर्ण ऋण र नेपाल सरकारको संयुक्त लगानीमा निर्माण सम्पन्न भएको सुरुङमार्गकाे भाेलि साउन ११ गते औपचारिक रुपमा उद्घाटन गर्न लागिएका हाे ।
सुरुङमार्ग आयोजनाको कुल लागत करिब १९ अर्ब रुपैयाँ रहेको छ भने मुख्य सुरुङको लम्बाई २ दशमलव ६८ किलोमिटर रहेको सडक विभागका महानिर्देशक डा. विजय जैसीले जनाएका छन् । सुरुङभित्रको निकास मार्ग (इभ्याकुएसन टनेल) र क्रस–प्यासेजहरू समेत गणना गर्दा कुल सुरुङको लम्बाई करिब ५ दशमलव ५ किलोमिटर पुग्ने बताइएकाे छ ।
उक्त आयोजनाको उद्घाटन पूर्वाधार विकासमन्त्री सुनिल लम्साल र जाइकाका अध्यक्षले संयुक्त रूपमा गर्ने तयारी रहेकाे छ । उद्घाटनपश्चात् तत्कालका लागि एम्बुलेन्स, दमकल र सुरक्षा निकायका आकस्मिक सवारी साधनलाई मात्र सुरुङमा प्रवेश दिइने विभागले जनाएको छ ।
वि.सं. २०७६ सालदेखि जापानी निर्माण कम्पनी ‘हाज्मा आन्दो कर्पोरेसन’ ले यस आयोजनाको निर्माण सुरु गरेको थियो । नागढुङ्गाको उकालो र पहिरोको जोखिमबाट जोगाई यात्रालाई सहज बनाउने विश्वासका साथ निर्माण गरिएकाे सुरुङमार्गलाई नेपालको सडक पूर्वाधारको क्षेत्रमा ठूलो उपलब्धि मानिएको छ ।
अन्य सवारी साधनका लागि क्रमश: मार्ग खुला गरिने सुरुङमार्गकमा सुरक्षा संवेदनशीलतालाई ध्यानमा राख्दै मोटरसाइकल र प्रज्वलनशील पदार्थ बोकेका सवारी साधनलाई प्रवेश निषेध गरिएको छ ।
