आज बिहान खसेको पहिरोका कारण चितवनको नारायणगढ–मुग्लिन सडकखण्ड अवरुद्ध भएकाेमा अहिले पहिराे पन्छाइएपछि यातायात सञ्चालनमा आएको छ । पहिरो हटाउने कार्य तत्काल सुरु गरिएको र केही समयको प्रयासपछि सडक पूर्ण रूपमा सञ्चालनमा आएको हो ।
आज बिहान करिब ७ बजे सडकमाथिबाट खसेको पहिरोका कारण उक्त सडकखण्ड दुवैतर्फ पूर्ण रूपमा अवरुद्ध भएको थियो । डिभिजन सडक कार्यालयका सूचना अधिकारी कृष्ण आचार्यका अनुसार पहिरो पन्छाइएपछि अहिले नारायणगढ–मुग्लिन सडकमा दुवैतर्फबाट सवारीसाधन निर्वाध रूपमा सञ्चालन भएकाे बताइएकाे छ ।
बिहान खसेकाे पहिरोका कारण केही समय सडकमा सवारीसाधनको लामो लाइन लागेको थियाे । सडक खुलेसँगै रोकिएका सवारीसाधनलाई गन्तव्यतर्फ पठाउने काम भइरहेको प्रहरीले जनाएकाे छ । उक्त सडकखण्डमा वर्षा याममा हिरो खस्ने जोखिम रहेकाले आवश्यक सतर्कता अपनाएर मात्रै यात्रा गर्न सम्बन्धित निकायले चालक तथा यात्रुलाई आग्रह गरेको छ ।
