सरकार आफ्ना मागप्रति गम्भीर नभएको भन्दै नेपाल वैदेशिक रोजगार व्यवसायी संघले आजदेखि देशभरका सम्पूर्ण म्यानपावर कम्पनी पूर्ण रूपमा बन्द गर्ने घोषणा गरेको छ । संघले म्यानपावर कार्यालय बन्द गर्नुका साथै वैदेशिक रोजगारीमा श्रमिक पठाउने सम्पूर्ण प्रक्रिया समेत आजदेखि ठप्प पारेको हाे ।
संघले सरकारलाई आफ्ना माग सम्बोधन गर्न पटक–पटक आग्रह गरे पनि त्यसप्रति आवश्यक चासो नदेखाएपछि आन्दोलनलाई थप कडा बनाउँदै पूर्ण रूपमा काम–कारोबार बन्द गर्ने निर्णय गरेको बताइएकाे छ ।
संघले यसअघि आन्दोलनका विभिन्न चरणअन्तर्गत पूर्वअन्तिम श्रम स्वीकृति, नयाँ विज्ञापन प्रकाशन तथा भिसा स्ट्याम्पिङलगायतका काम रोकिसकेको थियो भने वैदेशिक रोजगारीका लागि श्रम स्वीकृति प्राप्त गरिसकेका श्रमिकलाई उडानमा पठाउन दिइएको समयसीमा समेत समाप्त भएपछि संघले सम्पूर्ण सेवा बन्द गर्ने निर्णय गरेको हो ।
अब देशभर सञ्चालनमा रहेका म्यानपावर कम्पनीबाट हुने नयाँ मागपत्र प्रक्रिया, श्रमिक छनोट, कागजात प्रक्रिया तथा वैदेशिक रोजगारीमा श्रमिक पठाउने अन्य काम प्रभावित हुनेछ । संघले सरकारलाई आफ्ना माग तत्काल सम्बोधन गर्न आग्रह गर्दै माग पूरा नभएसम्म आन्दोलन जारी रहने संकेत गरेको छ ।
आजदेखि हुने म्यानपावर व्यवसायीको आन्दोलनका कारण वैदेशिक रोजगारीमा जाने तयारीमा रहेका हजारौँ श्रमिक प्रभावित हुने देखिएको छ ।
