आज बिहान मकवानपुरमा भएको जिप दुर्घटनामा ६ जना घाइते भएका छन् । जिल्लाकाे भीमफेदी गाउँपालिका–६, जुरीखेलमा काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कारपियो जिप सडकबाट करिब ५०–६० मिटर तल खोल्सामा खसेर दुर्घटना भएको थियो ।
दुर्घटनामा घाइते हुनेमा दाङको तुलसीपुर उपमहानगरपालिका-९, घर भएका उच्च अदालत वीरगञ्जका मुख्य न्यायाधीश गोकर्ण डाँगी (५७), रजिष्ट्रार तारादत्त बडू (५७), बडूका श्रीमती लक्ष्मी बडू (४९), छोरा रितेन्द्र बडू (२५) र दिदी रिता बडू (३१) रहेका छन् । दुर्घटनामा दाङको राप्ती नगरपालिका-८, का ३२ वर्षीय जिप चालक छुनिलाल चौधरी समेत घाइते भएका छन् ।
दुर्घटना पछि घाइते सबैलाई उद्धार गरी उपचारका लागि भीमफेदी अस्पताल लगिएको थियो । अहिले जिप चालक चौधरी र रजिष्टार बडूलाई थप उपचारका लागि हेटौंडा अस्पताल पठाइएको छ भने अन्य ४ जना घाइतेलाई नेपाली सेनाको हेलिकप्टरमार्फत काठमाडौकाे छाउनी अस्पताल ल्याइएकाे छ ।
दुर्घटनास्थलमा जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्री नेतृत्वको टोली पुगेर उद्धार गरेकाे थियो भने दुर्घटनाका कारणबारे थप अनुसन्धान भइरहेको प्रहरीले जनाएको छ ।
