राष्ट्रिय स्वतन्त्र पार्टी (रास्वपा) ले आज मन्त्री र सांसदहरु राखेर अन्तरक्रिया कार्यक्रम गर्ने भएको छ । प्रतिनिधिसभाको बैठकमा सरकार र पार्टीका सांसदहरूबीच नै असमझदारी देखिन थालेपछि पार्टीले आज मन्त्रीहरूसहित राखेर अन्तरक्रिया गर्ने भएको हाे ।
आज बिहान ११ बजे संसदीय दलको कार्यालयमा हुने अन्तरक्रियामा पार्टी सभापति रवि लामिछानेले उनीहरूलाई निर्देशन दिने बताइएको छ । बैठकमा पछिल्लो समय सरकार र पार्टीका सांसदहरूबीच बढिरहेको असमझदारी लगायतका गतिविधिमाथि समीक्षा हुनेछ ।
संसदीय अनुशासनको विषयमा प्रश्न उठेका सांसदहरूलाई सचेत गराइने र सांसदहरूले संसद्मा बोल्ने भाषा, सार्वजनिक गतिविधि समेत मर्यादित हुनुपर्नेमा त्यसमा ख्याल नगर्ने प्रवृति बढेकोले रास्वपाभित्र असमझदारी बढेकाले त्यसकाे समधानका लागि अन्तरक्रिया गर्न लागिएको हाे ।
प्रतिनिधिसभाको हिजाेको बैठकमा परराष्ट्रमन्त्री शिशिर खनालले दिएको जवाफमा चित्त नबुझेपछि सांसद आशिका तामाङले पुनः प्रश्न गर्न खोजेकी थिइन् । तर सभामुख डीपी अर्यालले उनलाई संसदीय मर्यादा र गरिमाको ख्याल गर्न सचेत गराउँदै बोल्न समय नदिएपछि सांसद तामाङ संसद् बैठक छाडेर बाहिरिएकी थिइन् ।
