काठमाण्डू, नेकपा (एकीकृत समाजवादी) का सम्मानित नेता झलनाथ खनालले नेपालका दुई ठूला पार्टी भ्रष्ट भएको आरोप लगाएका छन् ।
आइतबार एकीकृत समाजवादी केन्द्रीय कमिटीको प्रथम पूर्ण बैठकलाई सम्बोधन गर्दै उनले कांग्रेस र एमाले सबैभन्दा घमन्डी र दलालवादी पार्टी भएको आरोप लगाएका हुन् ।
उनले भने, ‘अहिले दुई पार्टीको सरकार बनेको छ । यस्तो विश्व परस्थितिमा दुई दलको सरकार बनेको छ । दुई वटै घमन्डी र भ्रष्ट पार्टी हुन् ।
अवसरवादी पार्टीहरू हुन् । एउटा त प्रतिक्रियावादी दलाल पुँजीवादकै प्रतिनिधि भइहाल्यो, अर्को घोर अवसरवादी दक्षिणपन्थी नेतृत्व भएको पार्टी हो ।
दलाल पुँजीवाद र दक्षिणपन्थी अवसरवादीको घेराबन्दीमा गठबन्धन सरकार बनेर के निश्चित गर्छ भने दुई पार्टी सिस्टममा बस्न सक्दैनन् ।’
उनले एउटै पार्टीले बहुमत लिएर आए पनि मल्टिपाटी सिस्टममा नटिक्ने जिकिर गरे ।
उनले भने, ‘कमसेकम नेपालमा असम्भव छ, मल्टिपाटी सिस्टम । केही हुनेवाला पनि छैन ।
देशमा मल्टिपाटी सिस्टम स्थापना भए पनि पुँजीवादी मल्टिपाटी सिस्टम हो । पुँजीवादमा मल्टिपाटी सिस्टम अन्त्यसम्म रहन्छ ।’
