काठमाण्डू, आज सुनचाँदीकै मूल्य घटेको छ। गएको शुक्रबार घटेको सुनको मूल्यमा आज पनि गिरावट आएको हो।
नेपाल सुनचाँदी व्यवसायी महासंघका अनुसार सुनको मूल्य आज तोलामा चारसय रुपैयाँ घटेर एक लाख ४९ हजार सातसय रुपैयाँमा झरेको छ।
शुक्रबार सुनको मूल्य तोलामा ६ सय रुपैयाँ घटेर एक लाख ५० हजार एकसय रुपैयाँ कायम भएको थियो।
अघिल्लो साता सुनको मूल्य दुई दिनमै तोलामा साढे १८ हजार रुपैयाँ घटेको थियो।
आज चाँदीको मूल्य पनि तोलामा २५ रुपैयाँ घटेको छ। आज चाँदीको मूल्य प्रतितोला एक हजार आठसय ६५ रुपैयाँ कायम भएको महासंघले जनाएको छ।
शुक्रबार चाँदीको मूल्य एक हजार आठसय ९० रुपैयाँ थियो। सरकारले भन्सारदर घटाएपछि सुनचाँदीकै भाउमा उच्च गिरावट आएको हो।
गत कात्तिक १५ गते सुनको मूल्यले हालसम्मकै महँगो कीर्तिमान बनाएको थियो। त्यो दिन सुन प्रतितोला १ लाख ७१ हजार रुपैयाँ पुगेको थियो।
त्यसयता सुनको मूल्य प्रतितोला २१ हजार तीनसय रुपैयाँ घटिसकेको छ।
