मुगू , मुगूम कार्मारोङ्ग गाउँपालिका वडा नं २ मुगु गाउँका स्थानीयले पालेका चौरी तथा याकहरु अज्ञात रोगले मरेका छन् ।
मुगू गाउँका स्थानीय छोर्तेन लामाले दिएको जानकारी अनुसार शनिबारसम्म ६० वटा चौरी तथा याकहरु उक्त रोगबाट ग्रसित भइ मरिसकेका हुन् ।
शुरुमा चौरी तथा याकहरुले मुखबाट र्याल निकाल्ने, पातलो हरियो रङ्गको दिसा गर्ने, दिसामा हल्का रगत देखिने लक्षण देखिएको २४ घण्टा भित्रमा याक तथा चौरीहरुको मर्ने गरेको स्थानीय लामाले बताए ।
अज्ञात रोगले चौरीहरु प्रभावित भैरहेको भन्ने खबर पाउँदा बित्तिकै गाउँपालिकाले औषधि र पशु स्वास्थ्यकर्मीसहित मुगु गाउँमा पठाए पनि पालिकाको उपचार गर्न पालिकाको जनशक्ति र औषधिको क्षमताले नसक्ने अनि चौरीहरुको स्वाप संकलन गरी ल्याबमा परीक्षणका लागि पठाउनु पर्ने भएकाले त्यस्तो साधन र जनशक्ति गाउँपालिकामा नभएकाले जिल्ला भेटनरी तथा पशु अस्पताल गमगढी र प्रदेशलाई सहयोग आग्रह गर्दै पत्र पठाएको मुगूम कार्मारोङ्ग गाउँपालिकाका प्रमुख प्रशासकीय अधिकृत सुवासचन्द रावलले बताए ।
पालिकाको पत्र पाउनासाथ घटनास्थलतर्फ हिँडेको भेटनरी तथा पशु अस्पतालको चिकित्सक सहितको टोली सिरानी चौरमा पुगिसकेको र मध्यामिक विद्यालय माग्रीमा पशु स्वास्थ्य प्राविधिक शिक्षा अध्यापन गराउने २ जना पशु चिकित्सक पनि पालिकाको आग्रह तथा समन्वयमा घटनास्थलतर्फ गएको साथै तीन तिरबाट गरी अहिले मुगु गाउँतर्फ ७ सदस्यीय चिकित्सक तथा प्राविधिक टोली औषधीसहित गैसकेको प्रमुख प्रशासकीय अधिकृत रावलले जानकारी गराए ।
उनका अनुसार मुगू गाउँमा चिसोका कारण स्थानीय बेशितिर अस्थायी बसाइ सरेकाले गाउँमा कोही नहुँदा चौरी रहेका लेकहरुमा स्वास्थ्यकर्मीको टोली पुग्न कठिन भैरहेको छ । त्यसैमा झन् मंगलबारबाट हिमपात हुन थालेपछि झनै समस्या भएको छ ।
चौरीहरु हिमालतिर रहेका र गाउँ नझरेकाले हिउँ पाटनहरुमा कति चौरी तथा याकहरु मरे यकिन तथ्यांक प्राप्त गर्न गार्हो भएको र शनिबारसम्म ६० भन्दा बढी मरेको खबरको आधारमा अनुमान गर्ने हो भने आजसम्म १०० भन्दा बढी चौरी तथा याकहरु उक्त अज्ञात रोगबाट मरिसकेको हुन सक्ने गाउँपालिकाका प्रमुख प्रशासकीय अधिकृत रावलले अन्दाज लगाए ।
उच्च हिमाली क्षेत्र,भौगोलिक कठिनाइ, दुर्गमता र उर्वर जमीन कम भै आयातित खानामा बाँच्नु पर्ने भएकाले मुगूम कार्मारोङ्ग गाउँपालिकाका स्थानीयहरुले दूध खान,छुर्पी बनाउन र भारी बोक्न चौरी तथा याकहरु पाल्ने गर्दछन् ।
