काठमाण्डू, पत्रकार श्यामसुन्दर पुडासैनीको निधन भएको छ । प्रेस चौतारी नेपालको एसोसिएट प्रदेश उपाध्यक्षको जिम्मेवारीमा रहेका पुडासैनीको गएको राति उपचारको क्रममा ३३ वर्षको उमेरमा निधन भएको हो ।
बेलकोटगढी –९, नुवाकोट स्थायी निवासी पुडासैनी नेपाल भ्यूज अनलाइनको उपसम्पादक थिए ।
पत्रकार पुडासैनी माउन्टेन टेलिभिजन, आजतक भारतीय टेलिभिजन, हिमालयन टाइम्स डेली, प्राइम टेलिभिजन, रेडियो अन्नपूर्णलगायतका मिडियामा काम गरिसकेका थिए ।
पत्रकार पुडासैनीको निधनप्रति पत्रकार महासघ, प्रेस युनियन र प्रेस चौतारी नेपालले गहिरो दुःख व्यक्त गरेको छ ।
तीनै संगठनले विज्ञप्ति जारी गर्दै पत्रकार पुडासैनीको अकल्पनीय निधनले सङ्गठन तथा पत्रकार क्षेत्रमा अपूरणीय क्षति भएको उल्लेख गर्दै उनीप्रति श्रद्धाञ्जली व्यक्त गर्दै शोकाकुल परिवारजनमा समवेदना प्रकट गरेको छ ।
पुडासैनीको अन्त्यष्टि नुवाकोटको देवीघाटमा हुने परिवारका सदस्यले जनाएका छन् ।
