नवलपरासी, पूर्वपश्चिम राजमार्गअन्तर्गत नवलपरासी पूर्व नवलपुरको दुम्किबासमा पुल भाँचिएर रोकिएका सवारी वैकल्पिक मार्गबाट चल्न थालेका छन्।
विनयी खोलाको पुल शुक्रबार साँझ भाँच्चिएर रोकिएको सवारी साधन वैकल्पिक बाटोबाट गन्तव्यतर्फ जान थालेका हुन्।
पुल पूर्ण रूपमा भाँच्चिएर क्षति पुगेपछि यातायात अवरूद्ध हुँदा रोकिएका सवारीलाई वैकल्पिक मार्गको प्रयोग गरी सञ्चालनमा ल्याइएको नवलपरासी पूर्वका प्रमुख जिल्ला अधिकारी अरूण पोख्रेलले बताए।
पुल तत्काल मर्मत सम्भव नभएको र डाइभर्सन निर्माणको काम नहुँदासम्मका लागि वैकल्पिक मार्गको प्रयोग हुने उनले बताए।
रोकिएका सवारीलाई विनयी त्रिवेणी(२, ज्यामिरे भित्रीबाटो प्रयोग गरी त्रिवेणी क्रसर हुँदै गुम्बाचोकस्थित राजमार्गमा निस्कने प्रबन्ध गरिएको छ। पुल नहुँदा अब सवारी साधनले करिब ५ किलोमिटर घुम्नुपर्ने भएको छ।
दोस्रो बाटोको रूपमा ज्यामिरे पेट्रोलपम्प नजिकैबाट सिजी चोक–डाँडाजोर–होङ्सी गेट हुँदै करिब १८ किलोमिटर घुमेर राजमार्ग पुग्ने गरी ठूला सवारीसाधन सञ्चालनको व्यवस्था गरिएको छ।
विनयी खोलामा बनेको २४६ मिटरको पुल पूर्णरूपमा क्षति पुगेको छ। कृष्णनगर भन्सारबाट छुटेको एन एल ०१ ए एच ५१६९ नम्बरको शिवम् सिमेन्टको सामान बोकेको ६० टन क्षमताको ट्रक पुल पार गर्ने क्रममा बीच भागबाट पुल भाँचिएको थियो।
ट्रक पुलको बीच भागमा नै फसेको छ। शुक्रबार साँझ ५ बजे पुलको बीच भाग भाँसिएपछि यातायात अवरुद्ध भएको थियो।
