काठमाडौँ- धरानमा विद्यमान खानेपानीको समस्याप्रति ध्यानाकर्षण गराउन हर्क साम्पाङको टोलीले बोकेको रित्तो गाग्री प्रहरीले नियन्त्रणमा लिएको छ।
मंगलबार बिहान प्रहरीले रित्तो गाग्री नियन्त्रणमा लिएपछि गाग्रीबिनै मेयर हर्क साम्पाङ सिंहदरवार प्रवेश गरेका छन्।
रित्तो गाग्री बोकेर काठमाडौँ आएका उपमहानगरपालिकाका मेयर हर्क सम्पाङ उक्त गाग्री लिएरै सिंहदरबार प्रवेश गर्ने योजनामा थिए। तर प्रहरीले मेयर साम्पाङको योजना विफल पारेको हो।
मेयर साम्पाङ सिंहदवारस्थित खानेपानी मन्त्रालयमा पुगेका छन्। यसअघि धरानको भानुचोकमा रित्तो गाग्री बोकेर प्रदर्शन गरेका थिए। उनले आजै प्रधानमन्त्री केपी शर्मा ओलीलाई पनि भेट्ने कार्यक्रम रहेको छ।
हर्क साम्पाङले खानेपानीको विषयलाई चुनावी मुद्दा बनाएका थिए। सोही मुद्दाका कारण उनले नतिजा आफ्नो पक्षमा पनि पारेका थिए। तर धरानमा खानेपानीको समस्या समाधान गर्न दिगो कार्यक्रम अघि बढेको छैन।
धरानमा ४१ वर्षसम्म पानी वितरण गरिरहेको खानेपानी संस्थान विघटन गरेर २०७७ फागुनमा खानेपानी व्यवस्थापन बोर्ड गठन गरिएपनि अभाव उस्तै छ।
