काठमाण्डू, राष्ट्रिय प्रजातन्त्र पार्टी राप्रपाको केन्द्रीय कार्य समितिको बैठक सुरु भएको छ ।
बैठक अगाडि सञ्चारकर्मीहरूसँग कुरा गर्दै अध्यक्ष राजेन्द्र लिङ्देनले लामो समयदेखि बस्न नसकेको बैठक आजदेखि प्रारम्भ भएको बताए ।
आजको बैठकमा वर्तमान समसामयिक राजनीतिबारे छलफल हुने बताइएको छ । साथै, पार्टीका आगामी रणनीति, प्रतिपक्षको भूमिका र प्रतिपक्ष दलहरूसँगको सहकार्य लगायतका विषयमा छलफल गरिने अध्यक्ष लिङ्देनले बताए ।
उनले ठूला दुई दल मिलेर बनेको सरकारले अहिलेसम्म के – के गरेको छ त्यसको बारेमा समेत समीक्षा गरिने बताए ।
उनले भने, ‘लामो समयदेखि बस्न नसकेको बैठक आज प्रारम्भ हुँदै छ । यो बीचमा नेपाली कांग्रेस, नेकपा एमालेजस्ता दुई ठूला दल मिलेर सरकार बनेको पनि ६ महिना भन्दा बढी भइसकेको छ, यसको विषयमा पनि समग्र रूपमा समीक्षा गरिनेछ ।
यो बीचमा जनतामा आशा जागृत हुनुपर्ने हो त्यसको बदला जनतामा घोर निराशा पैदा भएको छ ।’
यसैगरी बैठकमा अर्थतन्त्र शिथिल र कमजोर भएकोबारे छलफल गरिनेछ । महँगी चरम रूपमा बढेको छ, यतिबेला निर्माण सामग्रीको मूल्य वृद्धि भएको छ ।
यसको विषयमा पनि बैठकमा छलफल गरिने उनले बताए । राप्रपाले आज र शनिबार केन्द्रीय समिति बैठक गर्न लागेको हो ।
