काठमाण्डू, तीन ठूला दलका शीर्ष नेताको बैठक सोमबार बस्दैछ ।
प्रधानमन्त्री तथा नेकपा एमालेका अध्यक्ष केपी ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच छलफल हुन लागेको हो ।
बैठक अपरान्ह ४ बजे सिंहदरबारमा बस्ने तय भएको प्रधानमन्त्रीका विज्ञ सल्लाहकार अग्नि खरेलले जानकारी दिए ।
बैठकमा सङ्क्रमणकालीन न्याय (टिआरसी) बारे छलफल हुने बताइएको छ ।
यही चैत ६ गतेको प्रतिनिधिसभा बैठकमा माओवादी केन्द्रकी सांसद विमला सुवेदीले टिआरसीको विषयमा सोधेको प्रश्नमा प्रधानमन्त्री ओलीले दाहालसँग सम्पर्कको प्रयास भइरहेको जवाफ दिएका थिए ।
यो विषयमा दाहालसँग सम्पर्क गर्न खोजिरहेको तर पटकपटक प्रयास गर्दा सम्पर्क नभएको बताएका थिए ।
यसअघि टिआरसीको विषयमा छलफल गर्न चैत ४ गते प्रधानमन्त्री ओलीका विज्ञ सल्लाहकार खरेल खुमलटार पुगेका थिए ।
तराई/मधेश जागरण अभियानमा रहेका दाहाल छलफलका लागि सोमबार नै काठमाडौँ आउने भएका छन् ।
