काठमाण्डू, भ्रष्टाचारको आरोपमा अख्तियार दुरुपयोग अनुसन्धान आयोगको छानबिनमा परेका प्रेमनाथ ठाकुरलार्ई नेपाल नागरिक उड्डयन प्राधिकरणको निमित्त महानिर्देशकको जिम्मेवारी दिइएको छ ।
हाल वैदेशिक भ्रमणमा रहेका महानिर्देशक प्रदीप अधिकारीको अनुपस्थितिमा ठाकुरलाई निमित्त महाप्रबन्धक तोकिएको हो ।
२०७९ फागुनदेखि अख्तियारले ठाकुरविरुद्ध भ्रष्टाचार तथा पददुरुपयोग सम्बन्धी मुद्दामा छानबिन गरिरहेको छ ।
यसअघि पनि निलम्बनमा परेका उपमहानिर्देशक ठाकुरलाई हवाइ सेवा निर्देशनालयको प्रमुखको जिम्मेवारी दिइएको थियो ।
त्रिभुवन अन्तर्राष्ट्रिय विमानस्थलको महाप्रबन्धक ठाकुरले अन्तर्राष्ट्रिय हवाई कम्पनीसँग घुस मागेको अडियो सार्वजनिक भएपछि प्राधिकरण सञ्चालक समितिले निलम्बन गरेको थियो ।
पर्यटन मन्त्रालयको निर्देशनमा ठाकुरलाई निलम्बन गरिएको थियो भने आन्तरिक रूपमा छानबिन गर्न प्राधिकरणले उपसमिति खडा गरेको थियो।
उक्त उपसमितिले दोषी देखिन प्रमाण जुटाउन नसकेको र उपसमितिकै सिफारिसमा निलम्बन फुकुवा गरे लगत्तै जिम्मेवारी दिइएको हो ।
तर, अख्तियार दुरुपयोग अनुसन्धान आयोगमा भने ठाकुरको मुद्दा छानबिनमा नै रहेको छ ।
प्राधिकरणले निलम्बन गरेसँगै ठाकुरको मुद्दालाई आयोगले पनि छानबिन प्रक्रिया अघि बढाएको थियो ।
२०७९ माघ २६ गते थाइ स्माइल एयरलाइन्सको नेपालका लागि जनरल सेल्स एजेन्ट (जीएसए) सोसाइटी इन्टरनेशनलका प्रतिनिधिसँग गैरकानूनी लाभ लिने सम्बन्धको अडियो सार्वजनिक भएको थियो ।
पछिल्लो समयमा नेपालका सरकारी कार्यालयहरूमा कार्यकुशलता वा स्पष्ट छविका आधारमा होइन, पहुँच र राजनीतिक सम्बन्धको भरमा जिम्मेवारी बाँडफाँड गर्ने प्रवृत्ति मौलाउँदै गएकोप्रति आलोचना हुँदै आएको छ ।
प्राधिकरणभित्रको आन्तरिक दबाब, व्यक्तिगत समीकरण, र पहुँचको समीकरण मिलाएर ठाकुरलाई अगाडि सारिएको हो भन्ने शंका बढ्दै गएको छ ।
त्यसो त ठाकुरको सार्वजनिक छवि पनि त्यति राम्रो छैन ।
यसरी विवादास्पद पृष्ठभूमि भएका व्यक्तिलाई नेतृत्वमा ल्याउने सरकारी निर्णयले संस्थाको पेशागत स्वायत्तता, पारदर्शिता र जवाफदेहितामाथि गम्भीर असर पार्न सक्ने विज्ञहरू बताउँछन् ।
