काठमाण्डू, भिजिट भिषा प्रकरणमा संसदीय छानबिन समिति गठनको माग गर्दै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) का सांसदहरूले आज पनि प्रतिनिधिसभा बैठक बहिष्कार गरेका छन् ।
गत १३ जेठदेखि निरन्तर विरोधमा रहेको यी दुई दलका सांसद आजको बैठकमा आफ्ना धारणा राखेपछि बैठकबाट बाहिरिएका हुन् ।
बैठकमा रास्वपाका प्रवक्ता एवं सांसद मनिष झा र राप्रपाकी सांसद रोशन कार्कीले बोल्दै भिजिट भिषा वितरण र त्यसबाट सिर्जित संकटको समाधानप्रति सरकार गम्भीर नदेखिएको आरोप लगाए ।
सांसद झाले भिजिट भिषा प्रकरणका क्रममा ‘कुलिङ पिरियड’ मा देखिएको अनियमितताको जिम्मेवारी सभापति रामहरि खतिवडाले लिनुपर्ने भन्दै उनको पद टिकाइ असंवैधानिक भएको बताए ।
‘राज्य, व्यवस्था तथा सुशासन समितिका सभापतिमाथि नैतिकता प्रश्न उठिरहेको बेला हामीमाथि भने पटकपटक नैतिकता र नालायकीको प्रश्न उठाइन्छ,’ उनले भने, ‘यो दोहोरो मापदण्ड हो, जवाफ कसले दिने रु’
त्यसैगरी, राप्रपाकी सांसद रोशन कार्कीले सरकारको संवेदनशीलतामाथि प्रश्न उठाउँदै आन्दोलनरत सांसदको आवाज नसुनी संसद् चलाइरहनु गैरजिम्मेवार व्यवहार भएको टिप्पणी गरिन् ।
सरकार संसदप्रति उत्तरदायी हो कि संसद् सरकारप्रति रु,’ उनले प्रश्न गरिन् ।
रास्वपा र राप्रपाले छानबिन समिति गठन नभएसम्म संसदमा नियमितरूपमा सहभागी नहुने अडान लिँदै आएका छन् ।
