काठमाण्डू, नेपाली कांग्रेसका महामन्त्री गगन थापाले बहुमतका आधारमा जे पनि गर्नसक्ने छुट दलहरूलाई नहुने बताएका छन्।
प्रजातन्त्र सेनानी नन्दप्रसाद शिवाकोटी स्मारिका विमोचन कार्यक्रमलाई सम्बोधन गर्दै सत्तामा पुग्ने कुरा सशर्त हुने र आधारभूत मूल्य तथा मान्यतासँग सम्झौता गरी प्राप्त भएको सत्ताको कुनै अर्थ नरहने बताए।
उनले कार्यक्रममा भने, ‘चुनाव जित्ने आकाङ्क्षा राख्नुलाई स्वाभाविक रूपमा लिनुपर्छ । तर, सबै कुरा त्यो होइन ।
सत्तामा पुग्ने कुरा पनि सशर्त हो, निशर्त होइन। हाम्रा आधारभूत मूल्य र मान्यतासँग सम्झौता गरेर प्राप्त भएको सत्ताको कुनै अर्थ रहँदैन ।
कांग्रेसको आस्था, सिद्धान्त, विचार र मूल्यमान्यता छ। त्योसँग सम्झौता गरेर सत्तामा टिकिराख्ने भन्ने कुरा हुँदैन ।’
उनले संख्याको आधारमा गरिने निर्णय वैधानिक हुने भएपनि सबैले स्वीकारे मात्रै वैध हुने बताए।
