काठमाण्डू, अविरल वर्षासँगैको बाढी र पहिरोले देशभरका विभिन्न नौ सडकमा आवतजावत पूर्ण अवरुद्ध भएको छ ।
बाढी, पहिरोका कारण आज विभिन्न नौ सडक अवरुद्ध भएको सडक विभागले जनाएको छ ।
विभागका अनुसार १५१ सडकखण्डमा एकतर्फी यातायात सञ्चालन भैरहेको छ । मुलुकभरका ३७१ सडकखण्डमध्ये २११ सडकखण्ड पूर्णरूपमा खुलेका छन् ।
बाढी, पहिरो, डुबानले सडकमा क्षति पुग्नु, सवारी साधन आवतजावतमा समस्या हुनु, पुल बगाउनु, पुल तथा सडक निर्माण, अन्य मर्मतकार्यलगायत कारण सडक अवरुद्ध भएको विभागका सूचना अधिकृत अमितकुमार शर्माले जानकारी दिए ।
कतिपय स्थानमा अझै पनि बाढी, पहिरोका कारणमर्मत गरेर सडक सुचारु हुन नसकेको उनले बताए । कतिपय स्थानमा पहिरो पन्छाउने काम भइरहेको उनको भनाइ छ ।
विभागका अनुसार यही असार २४ गते हिमताल फुटेर चीनबाट आएको बाढीका कारण गल्छी,त्रिशुली–मैलुङ–स्यापुबेशी–रसुवागढी सडकखण्ड अझैसम्म पूर्णरूपक अवरुद्ध भएको छ ।
यसैगरी हुम्लाको पैमा नदीमा पानीको बहाव बढिरहेको कारण कर्णाली करिडोर दक्षिण खण्ड पनि पूर्णरूपा अवरुद्ध छ ।
पानीको बहाव बढिरहेको र पुल निर्माण भइरहेको कारण उत्तर–दक्षिण कोशी राजमार्ग पनि पूर्णरूपक अवरुद्ध भएको विभागको तथ्याङ्कमा उल्लेख छ ।
यही साउन ६ गते बेलिब्रिज बाढीले बगाएका कारण तमोर करिडोरको चतुरा–मुलघाट–माझीटार–अमरापुर डाँडा–गणेशचोक सडकखण्ड अवरुद्ध भएको विभागले जनाएको छ ।
तातोपानी–टिमुरेस्थित ठोरी–रसुवागढी सडक पनि पूर्णरूपक अवरुद्ध भएको र हाल पहिरो पन्छाउने काम भइरहेको विभागको भनाइ छ ।
विभागका अनुसार पश्चिम रुकुमको भेरी करिडोरअन्तर्गत छिन्चु–मरिम सडकखण्ड पनि पूर्णरूपक अवरुद्ध भएको र लेदो पहिरो पन्छाउने काम भइरहेको छ ।
रासस
