फुङलिङ, ताप्लेजुङको मिक्वाखोला गाउँपालिकाको तेम्बा बजारमा आगलागी हुँदा एक करोडभन्दा बढीको क्षति भएको छ ।
मङ्गलबार मध्यराति बजारका चार वटा घरमा आगलागी भएर पूर्ण रुपमा नष्ट हुँदा एक करोड १८ लाख रुपियाँभन्दा बढीको क्षति भएको हो ।
स्थानीय बजारमा व्यवसाय सञ्चालन गरेर बस्नुभएका इन्द्रकुमार लिम्बू, राजकुमार लिम्बू, अनिल लिम्बू र विष्णुप्रसाद लिम्बूको घर जलेर पूर्ण रुपमा नष्ट हुँदा उक्त रकम बराबरको क्षति भएको प्रमुख जिल्ला अधिकारी शिवराज सेढाइँले जानकारी दिए ।
प्रारम्भिक विवरण अनुसार सबैभन्दा बढी राजकुमारको ५० लाख रुपियाँ बराबरको क्षति भएको छ ।
प्रजिअ सेँढाइका अनुसार इन्द्रकुमारको घर जलेर नष्ट हुँदा ४३ लाख, अनिलको २० लाख र विष्णुप्रसादको पाँच लाख रुपियाँ बराबरको क्षति भएको छ ।
आगलागीबाट इन्द्रकुमारको घरमा डेरा गरी बस्नुभएका दोर्ची शेर्पाको २५ मन अलैँचीसमेत जलेर नष्ट भएको छ ।
आगलागीबाट नै दुई ओटा मोटरसाइकल, सुनचाँदी, नगद, पशु चौपाया, लत्ताकपडा, खाद्यान्न लगायतका आवश्यक कागजात जलेर नष्ट भएको प्रहरीको भनाइ छ ।
रातको समय भएकाले कुनै पनि सामग्री निकाल्न नपाएको र नियन्त्रणका लागि दमकल पानीको समेत अभाव भएकाले बढी क्षति भएको स्थानीयको भनाइ छ ।
आगो बिहान साढे ५ बजे मात्र पूर्णरुपमा नियन्त्रणमा आएको थियो । पार्किङ गरी राखिएको मोटरसाइकलबाट आगलागी शुरु भएको बताइए पनि थप अनुसन्धान जारी रहेको प्रहरीले जनाएको छ ।
