काठमाडौँ, कांग्रेसमा महाधिवेशन विवाद उत्कर्षतिर उन्मुख भएको छ।
असोज २८ गतेदेखि शुरु भएको केन्द्रीय कार्यसमितिको बैठक र निरन्तर भएका अनौपचारिक बैठकले महाविधेशनको विवाद हल गर्न नसकेपछि विशेष महाधिवेशन पक्षधरले बुधबार विशेष भेला आयोजना गरेका हुन्।
अरु विषयमा निर्णय गरे पनि महाधिवेशनको विषयमा निर्णय गर्न नसक्दा स्थगित भएको बैठक बिहीबार दिउँसो २ बजेका लागि बोलाइएको छ। थप दबाब सिर्जना गर्न बुधबार विशेष भेला गरिएको हो।
महामन्त्रीद्वय गगन थापा र विश्वप्रकाश शर्माले विशेष महाधिवेशनको माग गर्दै ५४ प्रतिशत महाधिवेशन प्रतिनिधिहरुको हस्ताक्षर बुझाए पनि संस्थापन पक्ष तत्काल नियमित महाधिवेशनका लागि समेत तयार नभएपछि छुट्टै भेला आयोजनाग गरिएको हो।
कांग्रेस विधानअनुसार २०७८ मंसिरमा भएको पार्टीको १४औँ महाधिवेशनको चार वर्षे कार्यकाल यहीँ मंसिरमा सकिएको छ।
संस्थापन पक्ष नियमति महाधिवेशन नगर्ने दाउ लिएपछि महामन्त्री थापा र शर्माको अगुवाइमा हस्ताक्षर बुझाएर दबाब दिइएको थियो।
त्यसकोसमेत सुनुवाइ नभएको भन्दै राष्ट्रियसभा गृहमा विशेष भेलाको आयोजना गरिएको हो।
उनीहरुले फागुन २१ गतेका लागि तोकिएको चुनावभन्दा अगावै विशेष महाधिवेशन हुनुपर्ने अडान राखिरहेका छन्।
विशेष भेलाको अध्यक्षता २०१४ सालमा भएको कांग्रेसको प्रथम विशेष महाधिवेशनमा सहभागी भएका नेता ओमकार श्रेष्ठले गरेका छन्।
केन्द्रीय सदस्यहरू प्रतीमा गौतम, मधु आचार्य, तारामान गुरूङ, अजयबाबु शिवाकोटी र लुम्बिनी कांग्रेस सभापति अम्मरसिंह पुन र गण्डकी सभापति शुक्रराज शर्मा पनि भेलामा सहभागी भएका छन्।
