हेटौँडा, हेटौँडा उपमहानगरपालिकाले शहरका मुख्य सडकहरूको विस्तारको योजना अघि सारेको छ ।
यस योजनाअन्तर्गत सडकको मूल रेखाबाट दायाँतर्फ ५० मिटर र बायाँतर्फ २५ मिटरभित्र पर्ने सबै संरचना हटाइने भएको छ ।
यो मापदण्डभित्र २०३१ सालमा सडकका लागि मुआब्जा लिएर बनाइएका घरहरू पनि पर्नेछन् ।
करिब ५१ वर्षअघि मुआब्जा पाएको जग्गाधनीहरूले निर्माण गरेका घर तथा भवनहरू अहिले सडक विस्तारको नाममा भत्काउनुपर्ने अवस्था आएको हो ।
यस सडक विस्तारले हेटौँडा बजार क्षेत्र, राप्ती रोड, पूर्व–पश्चिम राजमार्ग खण्ड, बुद्धचोक–हुप्रचौर सडक, स्कुल रोड लगायतका मुख्य मार्गहरू प्रभावित हुनेछन् ।
सयौँ घर तथा व्यावसायिक भवनहरू भत्काउनुपर्ने अनुमान गरिएको छ । स्थानीय बासिन्दा भने यस योजनाप्रति आक्रोशित छन् ।
उपमहानगरपालिकाले प्रभावित परिवारलाई उचित मुआब्जा र पुनर्वासको व्यवस्था गर्ने आश्वासन दिएको छ ।
तर, मुआब्जा दर र प्रक्रिया अहिलेसम्म औपचारिक रूपमा तय भएको छैन । आगामी दिनमा यो विषयले ठुलो विवाद निम्त्याउने देखिएको छ ।
