काठमाण्डू, नेकपा एमालेको ११ औं महाधिवेशनको उद्घाटनका लागि मञ्च निर्माणको काम धमाधम भइरहेको छ ।
भोलि शनिबार महाधिवेशन उद्घाटनका लागि भक्तपुरको सल्लाघारीमा मञ्च निर्माणको काम अन्तिम चरणमा पुगेको छ ।
नेपालमा अहिलेसम्म बनेका मध्येकै अत्याधुनिक मञ्च बनाइएको मञ्च निर्माण समितिका संयोजक विनोद श्रेष्ठले बताए ।
उनका अनुसार उद्घाटनको मञ्चको पृष्ठभूमिमा चागुनारायण मन्दिर राखिएको छ । चार लेयरमा बन्न लागेको मञ्चमा ५ सय जना बस्न मिल्ने उनले बताए ।
मञ्चमा चारवटा लेयर रहने र माथिल्लो तलामा चाँगुनारायण मन्दिरको स्तम्भ खडा गरिएको उनको भनाइ छ ।
उनका अनुसार आज मञ्च निर्माण सकिने छ । टाढासम्म सुन्न सकिने गरी साउन्ड सिस्टमको व्यवस्था गरिएको श्रेष्ठले बताए ।
बुधबार सल्लाघारी चौरको सरसफाइ पनि गरिएको थियो । उद्घाटनका दिन ५ लाख नेता कार्यकर्ता उतार्ने लक्ष्य रहेको स्थायी कमिटी सदस्य लालबाबु पण्डितले बताए ।
शनिबार मध्याह्न अध्यक्ष केपी शर्मा ओलीले महाधिवेशनको उद्घाटन गर्नेछन् ।
