काठमाण्डू, नेपालको प्रमुख राजनीतिक दल नेकपा (एमाले) को ११ औं राष्ट्रिय महाधिवेशन आज (मंसिर २७ गते) देखि शुरु हुँदैछ ।
पाँच वर्षका लागि नयाँ नेतृत्व चयन गर्ने यस महाधिवेशनको तयारी पूरा भएको छ ।
महाधिवेशनको उद्घाटन सत्र भक्तपुरको सल्लाघारीस्थित नेपाल ट्रष्टको १०८ रोपनी क्षेत्रफलमा रहेको खुल्ला चौरमा हुँदैछ ।
बिहान ६ बजेदेखि नै देशभरका नेता तथा कार्यकर्ताहरू उद्घाटनस्थलमा आउने क्रम जारी रहेको छ ।
यस महाधिवेशनमा आयोजक, निर्वाचित र मनोनीत गरी २ हजार ४ सय भन्दा बढी प्रतिनिधि सहभागी हुनेछन् ।
यसका साथै, बन्दसत्रमा सल्लाहकार परिषद्का सदस्यसहित करिब २ हजार ६ सय १३ जना सहभागी हुनेछन् ।
