काठमाण्डू, नेकपा एमालेका अध्यक्ष केपी ओलीले निहीत स्वार्थ बोकेको अराजक तत्वले भदौ २३ को आन्दोलन भड्काएको बताएका छन् ।
एमालेको ११औं महाधिवेशन उद्घाटन समारोहलाई शनिबार भक्तपुरको सल्लाघारीमा सम्बोधन गर्दै ओलीले युवा विद्यार्थीहरूको शान्तिपूर्ण आन्दोलनलाई भड्काउँदा असामान्य परिस्थिति उत्पन्न भएको बताएका हुन् ।
तत्कालीन प्रधानमन्त्री समेत रहेका ओलीले भदौ २३ को घटना सम्झिँदै भने– सामाजिक सञ्जाल बन्द गर्ने होइन, नियमन गर्ने मात्र हाम्रो चाहना थियो ।
नवयुवाले प्रशासनलाई संविधानले दिएको अधिकार प्रयोग गर्दै शान्तिपूर्ण प्रदर्शन गर्ने बचन दिएका थिए । प्रशासनले अनुमति पनि दिएकै थियो ।
तर, दुस्खको कुरा त्यो कार्यक्रममा घुसपैठ भयो । विभिन्न स्वार्थ समूहरू प्रवेश गरे ।
अनि हिंसा र तोडफोड त के फूलको हाँगा पनि भाँच्दैनौं र निषेधित क्षेत्र तोड्दैनौं भन्ने प्रतिबद्धता व्यक्त गरेका युवा विद्यार्थीलाई अगाडि लगाएर निषेधित क्षेत्र तोड्ने, संसद् भवनमा तोडफोड र आगजनी गरेर दुरुत्साहन गर्ने तथा त्यसैका आडमा आफ्नो निहीत स्वार्थ पूरा गर्न हिंसा भड्काउने तत्वका कारण युवा विद्यार्थीहरूको ज्यान जाने दुस्खद् एवं अकल्पनीय परिस्थिति सिर्जना भयो ।
उनले भदौ २३ र २४ को घटनाका सबै मृतकप्रति श्रद्धाञ्जली अर्पण गरे ।
ुभदौ २३ गते गोली लागेर ज्यान गुमाएका युवा, भदौ २४ गते अराजक भीडको आक्रमणमा परी मारिएका सुरक्षाकर्मी र नागरिक सबैप्रति म यस विशाल सभाको तर्फबाट भावपूर्ण श्रद्धाञ्जली व्यक्त गर्दछु, ओलीले भने ।
