काठमाण्डू, नेपाली कांग्रेसका महामन्त्री गगन थापाले पार्टीभित्रको एकता र आत्मविश्वास मजबुत बनाउन पुस मसान्तभित्र विशेष अधिवेशन आह्वान अनिवार्य भएको बताएका छन्।
‘४९ औँ राष्ट्रिय एकता तथा मेलमिलाप दिवस’का अवसरमा जारी सन्देशमा उनले कांग्रेसको आत्मविश्वास पार्टी एकताबाट मात्र सम्भव हुने उल्लेख गर्दै फरक विचार व्यक्त गर्न सकिने साझा मञ्च आवश्यक रहेको बताए। उनका अनुसार त्यो साझा मञ्च विशेष अधिवेशन हो।
थापाले विधानअनुसार मात्र होइन, पार्टीको एकता र राष्ट्रिय जिम्मेवारी पूरा गर्न विशेष अधिवेशन अपरिहार्य भइसकेको स्पष्ट पारे।
‘नेपाली कांग्रेसले यही उत्तरदायित्व बोधका साथमा राष्ट्रिय भूमिका निर्वाह गर्न आत्मविश्वासको विन्दू खोजिरहेको छ।
यो आत्मविश्वास हाम्रो एकताबाट नै आउँछ। अनि एकता के बाट आउँछ ? निषेधबाट होइन, फरक विचारलाई बेवास्ता गरेर होइन – भिन्न मतहरू व्यक्त गर्ने साझा मञ्चको प्रयोगबाट मात्र त्यो एकताको उद्भव हुन्छ।
त्यो भनेको आजको समयमा कांग्रेसको विशेष अधिवेशन नै हो,’सामाजिक सञ्जालमा गगन लेख्छन्,’पौष मसान्त भित्र विशेष अधिवेशन गर्ने कार्य विधानतः बाध्यकारीमात्र नभएर पार्टीभित्रको एकता र आत्मविश्वासको लागि अनिवार्य बनेको छ।
उनले सबै कांग्रेस कार्यकर्तालाई एकताबद्ध भएर अघि बढ्न आह्वान गर्दै राष्ट्रिय एकता तथा मेलमिलाप दिवसको शुभकामना व्यक्त गरे।
