काठमाण्डू, गत भदौ २३ र २४ गते भएको जेजनी आन्दोलनपश्चात् नेपालको पूँजीबजारले खासै गति लिन सकिरहेको छैन ।
अस्थिर राजनीति र चुनावी माहोल राम्रो नबनेका कारण सेयर लगानीकर्ताहरुमा मनोबल बढ्न सकिरहेको छैन, जसकारण सेयरबजारले लय समाउन नसकिरहेको अवस्था छ ।
सेयरबजारमा संस्थागत लगानीकर्ताको रुपमा रहेका सामूहिक लगानी कोष अर्थात् म्युचुअल फण्डहरुको सेयरबजारमा अर्बौ रकम लगानी रहेको हुन्छ ।
बजारमा उताचढाव आउने बित्तिकै फण्डहरुको वित्तीय अवस्था नै फेरबदल हुने अवस्था आउँछ ।
सेयरबजार माथि उक्लिन नसक्दा अधिकांश बन्दमुखी तथा खुलामुखी योजनाहरु अर्थात् म्युचुअल फण्डहरु घाटामा देखिएका छन् ।
सञ्चालनमा रहेका ५२ म्युचुअल फण्डमध्ये मंसिर महिनामा ७ फण्ड मात्रै नाफामा देखिएका छन् भने ४५ वटा फण्ड अझैपनि घाटामा रहेका छन् ।
तर, घाटामा रहेका फण्डहरुले पनि अघिल्लो महिना अर्थात् कात्तिकको तुलनामा घाटा कम गरेका छन् ।
जसकारण सबै म्युचुअल फण्डहरुको प्रतिइकाई खुद सम्पत्ति मूल्य (न्याभ) बढ्न पुगेकोछ ।
कात्तिक महिनाको तुलनामा सेयरबजारमा केही प्रतिशत सुधार देखिँदा अधिकांश म्युचुअल फण्डहरुले घाटा कम गरेका छन् ।
उक्त महिनामा नाफा रहेका ७ म्युचुअल फण्डहरुमा सनराइज फोकस्ड इक्विटी फण्ड, सिटिजन्स सुपर ३० म्युचुअल फण्ड, सानिमा ग्रोथ फण्ड, सनराइज फर्स्ट म्युचुअल फण्ड, एमबीएल इक्विटी फण्ड, रिलायबल समृद्धि योजना र लक्ष्मी भ्यालु फण्ड–२ रहेका छन् ।
सबैभन्दा धेरै नाफा कमाउनेमा सनराइज फोकस्ड इक्विटी फण्डले ३ करोड ३३ लाख रुपैयाँ नाफा आर्जन गरेको छ ।
सबैभन्दा धेरै घाटा ब्यहोर्ने फण्डमा भने एनआइबीएल सहभागीता फण्ड रहेको छ । यो फण्डले मंसिर महिनामा कुल ४८ करोड ६० लाख रुपैयाँ घाटा ब्यहोरेको छ ।
अघिल्लो महिनामा भने फण्डले ६५ करोड ८८ लाख रुपैयाँ घाटा व्यहोरकेो थियो ।
सबै फण्डको न्याभमा सुधार
मंसिर महिनामा अधिकांश फण्डको प्रतिइकाई खुद सम्पत्ति मूल्य (न्याभ)मा सुधार देखिएको छ । सो अवधिसम्म एचएलआई लार्ज क्याप फण्ड बाहेक सबै फण्डको न्याभ बढेको छ ।
फण्डहरुले लगानी गरेका सेयररबण्डको मूल्य बढ्न पुग्दा न्याभ बृद्धि हुन पुगेको हो ।
साथै फण्डहरुको डिभिडेन्डमार्फत पनि न्याभ बढेको बुझ्न सकिन्छ र ब्याज आम्दानीमा पनि सुधार हुँदा फण्डको न्याभ बढ्न पुग्ने हुँदा अधिकांशको न्याभमा सुधार देखिएको छ ।
योसँगै क्यापिटल गेनबाट समेत फण्डहरुले न्याभ बढाएका हुन्छन् । कम मूल्यमा किनेको सेयर पछि मूल्य बढ्दा बिक्री गर्दा त्यो नाफा फण्डको सम्पत्तिमा जोडिन्छ ।
सो अवधिसम्म सबैभन्दा बढी न्याभ प्रमु स्मार्ट फण्ड र प्रभु सेलेक्ट फण्डको छ । प्रभु स्मार्टको ११.९१ रुपैयाँ र प्रभु सेलेक्टको न्याभ ११.६४ रुपैयाँ छ ।
अधिकांशले बढाए सेयरबजारमा लगानी
म्युचुअल फण्डहरुले सेयरबजारमा लगानी बढाएका छन् । संस्थागत लगानकिर्ताको रुपमा रहेको म्युचुअल फण्डहरुले मंसिर महिनामा ४.७५ प्रतिशतले लगानी बढाएका छन् ।
मंसिर महिनामा ५२ म्युचुअल फण्डको सेयरबजारमा कुल ५२ अर्ब ९९ करोड ६६ लाख रुपैयाँ लगानी रहेको छ ।
जुन यो कात्तिक महिनाको तुलनामा २ अर्ब ४० करोड ३२ लाख रुपैयाँ बढी हो । कात्तिकमा फण्डहरुको कुल ५० अर्ब ५९ करोड ३३ लाख रुपैयाँ लगानी रहेको थियो ।
सो अवधिसम्म ४१ वटा फण्डले सेयरबजारमा लगानी बढाएका छन् भने ११ वटा फण्डले भने घटााएका छन् ।
बैंकहरुको ब्याजदर घटेका कारण म्युचुअल फण्डहरुले सेयरबजारमा लगानी बढाएका छन् । सबैभन्दा बढी लगानी गर्नेमा एनआइबीएल सहभागीता फण्ड रहेको छ ।
यो फण्डको सेयरबजारमा मात्रै कुल ६ अर्ब ३८ करोड ५७ लाख रुपैयाँ लगानी रहेको छ । फण्डको लगानी अघिल्लो महिनाको तुलनामा ६.१६ प्रतिशत बढेको छ ।
साथै कात्तिकको तुलनामा मंसिर महिनामा सबैभन्दा बढी लगानी बढाउने फण्डमा भने एचएलआई लार्ज क्याप फण्ड रहेको छ ।
यो फण्डले ४१.७० प्रतिशतले सेयरबजारमा लगानी बढाएको छ ।
