मोरङ, नेपाली कांग्रेसका नेता डा. शेखर कोइरालाले पार्टी फुटबाट जोगाउन आफूले मध्यमार्गी धार अपनाएको बताएका छन्।
बिहीबार मोरङ क्षेत्र नम्बर ६ अन्तर्गत सुन्दरहरैंचामा आयोजित भेटघाट तथा छलफल कार्यक्रममा बोल्दै उनले पार्टीलाई सुरक्षित राख्न शान्त र सौम्य बाटो रोजेको स्पष्ट पारे।
नेता डा. कोइरालाले प्रतिनिधिसभा निर्वाचनका लागि पार्टी अघि बढिसकेको उल्लेख गर्दै निर्वाचनले मुलुकलाई स्पष्ट निकास दिने विश्वास व्यक्त गरे।
उनले विशेष महाधिवेशनमा सहभागी नभएको विषयमा स्पष्ट पार्दै भने, “यदि म विशेष महाधिवेशनमा गएको भए पार्टी फुट्थ्यो।
पार्टी नफुटोस् भनेर मैले बीचको बाटो लिएको हुँ। म त्यो हलमा गएको भए पार्टी दुई टुक्रा हुन्थ्यो, तपाईंहरूले बुझ्नुपर्छ।”
उनले पार्टी फुटाएर अघि बढ्नुभन्दा पार्टीलाई एकताबद्ध बनाएर निकास दिनु नै अहिलेको उत्तम विकल्प भएको बताए।
पार्टीलाई नफुटाई निर्वाचनमा एकढिक्का बनाएर लैजाने जिम्मेवारी आफूहरूको भएको उल्लेख गर्दै त्यसैअनुसार आफूले मध्यम मार्ग अपनाएको स्पष्ट पारे।
यस क्रममा आफूले धेरै आलोचना पनि खेप्नुपरेको बताउँदै नेता डा. कोइरालाले भने, “यदि म बैठकमा सहभागी भएको भए पार्टी सभापति म बन्थें वा अरू कोही बन्थ्यो, त्यो बेग्लै कुरा हो।
तर, पार्टी दुई टुक्रा हुन्थ्यो। त्यसबेला तपाईंहरूले के भन्नुहुन्थ्यो ? ”
कार्यकर्ता छलफलका क्रममा उनले विगतमा पार्टीभित्र भएका कमजोरीहरू स्वीकार गर्दै अब सबैले आगामी निर्वाचनमा केन्द्रित हुनुपर्नेमा जोड दिए।
निर्वाचनले मुलुकलाई निकास दिने बताउँदै यसपटक कांग्रेसलाई जिताउन सबै एकढिक्का भएर भूमिका खेल्नुपर्ने उनले आग्रह गरे।
