आज संसद्काे दुवै सदनको अधिवेशन सुरु

आजबाट संघीय संसद् अन्तर्गत दुवै सदनको अधिवेशन सुरु हुदैछ । नयाँ संसद् भवन सिंहदरबारमा दिउँसाे २ बजे बस्ने गरी राष्ट्रपति रामचन्द्र पौडेलले दुवै सदनको अधिवेशन आह्वान गरेका हुन् ।

गत भदाै २३ र २४ गते भएकाे जेन–जी आन्दोलनपछि फागुन २१ गते सम्पन्न प्रतिनिधिसभा सदस्य निर्वाचनबाट निर्वाचित सांसदहरुको पहिलो बैठकको अध्यक्षता ज्येष्ठ सदस्य अर्जुननरसिंह केसीले गर्ने छन् भने आजकाे बैठकले सभामुख निर्वाचनको दिन तोक्ने कार्यसूचीमा उल्लेख छ ।

बुधबार बसेको सर्वदलीय बैठकले सभामुख निर्वाचनको मिति तय गर्दै चैत २० गते सभामुख पदका लागि उम्मेदवार मनोनयन गर्ने र २२ गते निर्वाचन गर्ने तय गरेकाे थियाे । यता संसद् सचिवालयले पहिलो बैठकको सम्भावित कार्यसूची पनि सार्वजनिक गरेको छ ।

कार्यसूची अनुसार नयाँ नियमावली नबनेसम्म पुरानै नियमावलीअनुसार बैठक सञ्चालन गर्ने, सभामुखको अनुपस्थितिमा बैठकको अध्यक्षता गर्ने सांसदहरूको नाम तोक्ने र तीनवटा अध्यादेश पेस हुने छ । संघीय संसद्का महासचिव पद्मप्रसाद पाण्डेयका अनुसार पहिलो बैठकमा दलीय आधारमा सांसदहरूले धारणा राख्ने तथा संविधानसभाका पूर्वसदस्य र विभिन्न सांसदहरूको निधनमा शोक प्रस्ताव पेस गरिने कार्यसूची रहेकाे बताइएकाे छ ।