मुस्ताङमा भारी हिमपात

माथिल्लो मुस्ताङ क्षेत्रमा शनिबारदेखि भारी हिमपात भइरहेको छ । मुस्ताङ जिल्लाको माथिल्लो क्षेत्र र मुक्तिनाथ क्षेत्रमा शनिबार रातिदेखि भारी हिमपात भएको हो ।

मुस्ताङमा यसअघि गत कात्तिक १० गते पहिलो पटक हिमपात भएको थियो । अहिले भएकाे हिमपात माथिल्लो मुस्ताङ र मुक्तिनाथ क्षेत्रमा जारी हिँउद यामको यो छैटौँ पटक हाे । एक्याप लोमान्थाङका कार्यालय प्रमुख उमेश पौडेलका अनुसार माथिल्लो मुस्ताङ क्षेत्रका बस्ती र उच्च लेकमा शनिबार रातिदेखि भारी हिमपात भएको बताइएकाे छ ।

अहिले माथिल्लो मुस्ताङमा क्षेत्रमा एक फिटसम्म हिउँ परेको छ । स्वाङवचेदेखि माथि घिलिङ, घमी, चराङ, लोमान्थाङ, ठिङ्गर, छोसेर, सम्जुङ, नामासुङ, भर्सा, यारा, घारा, ढी र सुर्खाङलगायत स्थानमा छैटौँ पटक भारी हिमपात भएको हो ।

हिमपातका कारण स्थानीय जनजीवन प्रभावित हुनुका साथै शनिबार रातिदेखि परेको हिमपात अझै नरोकिएको र हिउँ पर्ने क्रम निरन्तर जारी रहेकाे बताइएकाे छ । माथिल्लो मुस्ताङ क्षेत्र पूरै हिउँले ढाकिएर सेताम्मे बनेका छ ।

यसअघि विगत तीन वर्ष मुस्ताङमा हिउँ परकाे थिएन भने यस सिजनमा छ पटकसम्म हिउँ पर्नु जलवायुको असर भएको विश्लेसकहरूले बताएका छन् ।