देशमा प्रजातन्त्र पुनर्बहाली भएको दिनकाे सम्झनामा आज विविध कार्यक्रमकाे आयोजना गरी जनआन्दोलन दिवस मनाइँदै छ । विसं २०४६ चैत २६ गते पञ्चायती शासन व्यवस्थाको अन्त्य गर्दै प्रजातन्त्र पुनःस्थापना भएको सम्झनामा याे दिवस मनाउन थालिएकाे हाे ।
विसं. २०१७ साल पुस १ गते राजा महेन्द्रले सुरु गरेको ३० वर्षीय पञ्चायती व्यवस्था २०४६ साल चैत २६ गते जनआन्दोलन मार्फत अन्त्य भएको थियाे । नेपाली कांग्रेसको नेतृत्वमा वाममोर्चासहित भएको संयुक्त जनआन्दोलनपछि ३० बर्से पञ्चायती व्यवस्थाको अन्त्य गर्दै प्रजातन्त्र पुनःस्थापना भएको हाे ।
नेपाली कांग्रेस नेता गणेशमान सिंहको नेतृत्वमा भएको जनआन्दोलन ५० दिनसम्म चलेको थियाे । उक्त जनआन्दोलनले २०४६ साल चैत २६ गतेका दिनदेखि नेपालमा बहुदलीय शासन व्यवस्था पुनःस्थापना गरेकाे थियो ।
विसं. २००७ साल फागुन ७ गते नेपालमा प्रजातन्त्र स्थापना भएको दिनको अवसर पारी २०४६ फागुन ७ गतेदेखि सुरु गरिएकाे जनआन्दोलन मार्फत तत्कालीन राजा वीरेन्द्रले देशवासीका नाममा सम्बोधन गर्दै चैत २६ गते बहुदलीय व्यवस्था पुनःस्थापना भएको घोषणा गरेका थिए ।
