अहिले मुलुकभर पश्चिमी र स्थानीय वायुको आंशिक प्रभाव रहेकाले माैसममा केहि परिवर्तन भएकाे मौसम पूर्वानुमान महाशाखाले जनाएको छ । जसको प्रभावकाे कारण हाल देशको हिमाली भूभागमा साधरणतया बादल लागेको बताइएकाे छ ।
त्यसैगरि कोशी, बागमती र गण्डकी प्रदेशको पहाडी भूभागमा आंशिक बादल लागेको छ भने बाँकी भूभागमा मौसम मुख्यतया सफा रहेको महाशाखाले जनाएकाे छ । आज दिउँसो हिमाली भूभागमा साधरणतया बादल लाग्नुका साथै कोशी प्रदेशको पहाडी र तराई तथा बाँकी पहाडी भूभागमा आंशिक बादल लाग्ने र बाँकी तराई भूभागमा मौसम मुख्यतया सफा रहनेछ ।
महाशाखाका अनुसार हिमाली भूभागका एक–दुई स्थानमा चट्याङ्गसहित मध्यम वर्षा र हिमपातको सम्भावना रहेको जनाइएको छ भने मधेस प्रदेशलगायत बागमती, गण्डकी, लुम्बिनी र सुदूरपश्चिम प्रदेशका तराईका उपत्यका र खोँचहरूमा तातो बढ्ने सम्भावना रहेको छ ।
त्यसैगरि लुम्बिनी र सुदूरपश्चिम प्रदेशका तराई क्षेत्रमा तातो लहरको सम्भावना रहने पनि महाशाखाले जनाएकाे छ । त्यस्तै आज राति देशको हिमाली भूभागमा आंशिक बादल लाग्नुका साथै पहाडी र तराई भूभागमा मौसम मुख्यतया सफा रहनेछ । यता कोशी र गण्डकी प्रदेशको हिमाली भूभागका एक–दुई स्थानमा हल्का वर्षा र हिमपातको सम्भावना रहेको पनि महाशाखाले जनाएको छ ।
