यसअघि इजरायल–अमेरिका र इरानबीचको युद्धका कारण बन्द गरिएकाे श्रम स्वीकृति खुला गरिएकाे छ । युद्धका कारण साउदी, यूएई, कतार, कुवेत, बहराइन, ओमान, इराक, जोर्डन, लेबनान, यमन, टर्की र इजरायललगायत १२ देशमा बन्द गरिएकाे श्रम स्वीकृति खुला गरिएकाे हाे ।
यसअघि २०८२ फागुन १७ गते ती देशमा श्रमस्वीकृति बन्द गरिएकाे थियाे । श्रम, रोजगार तथा सामाजिक सुरक्षा मन्त्रालयले आज मन्त्रीस्तरीय निर्णय गर्दै हिजाेदेखि पुनः खुला गरिएको हो । इराकको हकमा भने २०८२ पुस ११ गते मन्त्रिपरिषदबाट भएको निर्णय बमोजिम हुने मन्त्रालयले जनाएको छ ।
मन्त्रीस्तरीय निर्णय अनुसार श्रम मन्त्रालयले ती देशहरूमा व्यक्तिगत, संस्थागत र वैधानिकीकरणसहितका काम पूर्ववत् अवस्थामा हुनेगरी खुला गरेको बताइएकाे छ । परराष्ट्र मन्त्रालय अन्तर्गतको उच्चस्तरीय आपत्कालीन प्रतिकार्य कार्यदल (ईआरटी) ले खाडी तथा पश्चिम एसियाली देशमा श्रम स्वीकृति खुला गर्न सिफारिस गरेको थियो ।
ईआरटीको बैठकले खाडी तथा पश्चिम एसियास्थित सबै श्रम गन्तव्य मुलुकहरू वैदेशिक रोजगारीका लागि खुला गर्ने सिफारिस गरे अनुसार मन्त्रालयले श्रम स्वीकृति खुला गरेको हो ।
