आज नेकपा एमालेले पार्टी केन्द्रीय कार्यालय च्यासलमा कम्युनिस्ट पार्टी स्थापना दिवस मनाउन लागेकाे छ । आज दिउसो २ बजे मनाउन लागिएकाे उक्त कार्यक्रममा पार्टी अध्यक्ष केपी शर्मा ओलीले सम्बोधन गर्ने तयारी रहेकाे छ ।
दिउसो २ बजे च्यासलमा आयोजना गरिने ७७औँ स्थापना दिवसको कार्यक्रममा समसामयिक राजनीति र एमालेको आगामी कार्यदिशालगायतका विषयहरू समेटिने नेताहरुले बताएका छन् । कार्यक्रममा सहभागी हुन काठमाडौँ उपत्यकामा रहेका पार्टी केन्द्र, जनसङ्गठनका पदाधिकारी तथा केन्द्रीय सदस्य र शुभेच्छकहरुलाई आग्रह गरिएको छ ।
यसअघि अध्यक्ष ओलीलाई चैत १४ गते सरकारले गिरफ्तार गरेर चैत २६ गते रिहा गरेको थियो भने पित्तथैलीमा पत्थरीको शल्यक्रिया गरेर वैशाख ५ गते उनी घर फर्केका थिए । स्वास्थ्य लाभ गरिरहेका ओलीले पार्टी स्थापना दिवसका दिन नेता कार्यकर्तालाई सम्बोधन गर्ने तयारी रहेकाे पार्टी केन्द्रीय कार्यालय सचिव डा भीष्म अधिकारीले जनाएका छन् ।
नेपालमा पुष्पलाल श्रेष्ठको नेतृत्वमा २००६ साल वैशाख ९ गते नेपाल कम्युनिस्ट पार्टीको स्थापना भएको थियो ।
