दुई महिना अघि गत फागुनमा बागलुङकाे ढोरपाटन नगरपालिका फैलिएको दादुरा संक्रमण नियन्त्रणमा आउन थालेको छ । ढोरपाटन नगरपालिका–७, ८ र ९ मा गत २०८२ फागुन ८ गतेबाट फैलिएकाे दादुरा संक्रमण नियन्त्रणमा आउन थालेको हाे ।
विश्व स्वास्थ्य सङ्गठन, प्रदेश जनस्वास्थ्य कार्यालय र स्थानीय तहका स्वास्थ्यकर्मीको टोलीले संङ्क्रमण नियन्त्रणका लागि प्रभावित क्षेत्रमा पुगेर अध्ययन गरी खोप अभियान संचालन गरिएको थियो । फागुन २९ गतेदेखि चैत २ गतेसम्म यस क्षेत्रका बालबालिका तथा किशोरकिशोरीलाई खोप लगाएपछि सङ्क्रमण नियन्त्रणमा आउन थालेको बताइएकाे छ ।
खोप अभियान संचालन गर्नुपूर्व दैनिक १० देखि १५ जना दादुराका शङ्कास्पद बिरामी अस्पतालमा आउने गरेकामा पछिल्लो समय निसीखोला गाउँपालिकाको एक जना शङ्कास्पद बिरामी बुर्तिबाङ अस्पतालमा भर्ना भएको प्रदेश जनस्वास्थ्य कार्यालयका प्रमुख प्रवीण शर्माले जनाएका छन् ।
हालसम्म २ सय ३९ जना शङ्कास्पद बिरामी फेला परेकामा ३४ जना शङ्कास्पद बिरामीको नमूना परीक्षणका लागि काठमाडौँस्थित राष्ट्रिय जनस्वास्थ्य प्रयोगशालामा पठाइएकाे थियाे भने जसमा १४ जनामा दादुरा सङ्क्रमण पुष्टि भएको बताइएकाे छ ।
प्रदेश जनस्वास्थ्य कार्यालयका खोप सुपरभाइजर राजु खत्रीका अनुसार ६ हजार १ सय ४० जना १० देखि १९ वर्ष उमेर समूहका बालबालिका तथा किशोरकिशोरीलाई खोप लगाएको थियाे । जसमध्ये हालसम्म १ जनाबाहेक सबै शङ्कास्पद बिरामी निको भइसकेका छन् ।
