पश्चिमी तथा स्थानीय वायुसँगै पूर्वी भाग नजिक तल्लो वायुमण्डलमा रहेको न्यून चापीय क्षेत्रको प्रभावका कारण माैसममा बदली आएकाे छ । उक्त प्रभावका कारण मुलुककाे विभिन्न स्थानमा मेघगर्जन, चट्याङ र हुरीसहित वर्षा भइरहेकाे छ ।
अहिले देशका अधिकांश स्थानमा बादल लागेको छ भने बागमती र गण्डकी प्रदेशका धेरै तथा कोशी, लुम्बिनी र कर्णाली प्रदेशका केही स्थानमा मेघगर्जन, चट्याङ र हुरीसहित मध्यम वर्षा भइरहेको जल तथा मौसम पूर्वानुमान महाशाखाले जनाएको छ । त्यसैगरि मधेश र सुदूरपश्चिम प्रदेशका एकदुई स्थानमा पनि त्यस्तै प्रकृतिको वर्षा भइरहेको छ ।
आज दिउँसो मुलुकभर सामान्यदेखि पूर्ण बदली हुनुका साथै कोशी र मधेश प्रदेशका हिमाली र पहाडी भागका केही स्थानमा मेघगर्जन र चट्याङसहित मध्यम वर्षा तथा हिमाली क्षेत्रमा हिमपातको सम्भावना रहेकाे छ ।
आज राति देशका हिमाली क्षेत्रमा सामान्य बदली रहनेछ भने पहाडी र तराई क्षेत्रमा आंशिक बदली हुनुका साथै कोशी, बागमती र गण्डकी प्रदेशका हिमाली तथा पहाडी भागका केही स्थानमा मध्यम वर्षा तथा हिमपात हुन सक्ने महाशाखाले जनाएको छ ।
