टर्किस एयरआइलन्सको विमान टायरमा आगो लागेपछि अवरुद्ध भएकाे त्रिभुवन अन्तर्राष्ट्रिय विमानस्थल दुई घण्टापछि सुचारु भएको छ । बिहान पाैने ७ बजे इस्तानबुलबाट आएको टिके ७२६ जहाज विमानस्थलमा अवतरणको क्रममा टायरमा आगो लागेको थियो ।
जहाजका यात्रुहरुलाई इर्मेन्सी ढोका खोलेर धावनमार्गमै उद्धार गरिएकाले विमानस्थलमा सेवा अवरुद्ध भएको थियाे । विमानमा चार बालबालिकासहित २७७ यात्रु रहेका थिए । उद्धारका क्रममा केही यात्रुलाई सामान्य चोट लागेको भएपनि अन्य जाेखिम भने भएन ।
अहिले २ घण्टापछि सेवा सुचारु भएपनि त्यसबीचमा काठमाडौं आउँदै गरेका कतिपय आन्तरिक तथा वाह्य उडानका विमान डाइभर्ट भएका थिए । साढे ९ बजेपछि भने विमानस्थल सेवा पूर्ण रुपमा संचालनमा आएको छ ।
