राष्ट्रिय महिला आयोगले नारायणहिटी दरबारस्थित साविककाे राहदानी विभागमा सर्दैछ । आयोगले उक्त भवनबाट सेवा प्रवाह गर्ने तयारी गरेको हाे ।
अहिले नारायणहिटीस्थित नयाँ भवनबाट काम सुरु भइसकेको र एक साताभित्र त्यहीबाट सम्पूर्ण सेवा सञ्चालन गर्ने तयारी भइरहेकाे आयोगले जनाएकाे छ । आयोगका सदस्य एवं प्रवक्ता कृष्णकुमारी पौडेल खतिवडाले अहिले आयोगको ११४५ हेल्पलाइन सेवा र उजुरीसम्बन्धी काम भद्रकालीस्थित कार्यालयबाट सञ्चालन भइरहेकाे भएपनि केही दिनभित्र ती सेवा नारायणहिटीबाटै सञ्चालन हुने बताएकी छन् ।
आयोग स्थापना भएदेखि नै भद्रकालीस्थित भाडाको भवनबाट सञ्चालन हुँदै आएकोमा पछिल्लो समय आयोगले खाद्य व्यवस्था तथा व्यापार कम्पनी लिमिटेडको भवनसमेत प्रयोग गर्दै आएको थियो । आयोगले पानी, बिजुलीसहित मासिक ४ लाख रुपैयाँ भाडा तिर्दै आएको बताइएको छ ।
यसअघि तत्कालीन मन्त्रिस्तरीय निर्णयअनुसार २०८० असोज २१ गते आयोगलाई नारायणहिटीस्थित उक्त भवनमा सार्ने निर्णय भएपनि विभिन्न प्रशासनिक कारणले प्रक्रियाअघि बढ्न सकेको थिएन । सरकारको प्रशासनिक सहजीकरणपछि कार्यालय सार्ने काम अघि बढेको हो ।
हाल आयोगले दैनिक २० देखि २५ जनालाई प्रत्यक्ष सेवा दिइरहेकाे छ भने ११४५ हेल्पलाइनमार्फत देश तथा विदेशबाट दैनिक औसत ५० जनाभन्दा बढिले सेवा लिने गरेका छन ।
