देशभर अब नयाँ सार्वजनिक सवारी साधन दर्ता नहुने भएकाे छ । सरकारले सातै प्रदेशका मन्त्रालयहरू र देशैभरिका स्थानीय तहलाई पत्राचार गर्दै अर्को सूचना जारी नभएसम्मका लागि नयाँ सार्वजनिक सवारी साधनको दर्ता नगगर्न भनेकाे हाे ।
यातायात व्यवस्था विभागले सार्वजनिक यातायातको वैज्ञानिक व्यवस्थापन हुन नसक्दा अत्यधिक वायु प्रदूषण बढेको, सडकमा सवारीको चाप र ट्राफिक जामले आवतजावतमा कठिनाइ थपेकाे भन्दै उक्त निर्णय लिएकाे बताएकाे छ ।
विभागको अनुसार इन्धनको बढ्दो मूल्यका कारण सार्वजनिक सवारी र समग्र यातायात क्षेत्रमा परेको असहज परिस्थितिलाई सम्बोधन गर्न पनि नयाँ दर्ता रोकेर मौजुदा प्रणालीलाई नै व्यवस्थित गर्नुपर्ने उल्लेख गरिएकाे छ ।
विभागले यो निर्णय ‘सवारी तथा यातायात व्यवस्था ऐन, २०४९’ को दफा २४ को उपदफा (३)मा टेकेर गरेको बताउँदै उक्त ऐनमा वातावरण प्रदूषण, सवारीको चाप, सडकको स्थिति वा अन्य कारणले सार्वजनिक हितका लागि कुनै किसिमको सवारी साधनको दर्ता रोक्न मनासिब देखेमा विभागले आदेश दिन सक्ने कानुनी व्यवस्था रहेकाे बताएकाे छ ।
नयाँ सार्वजनिक सवारी साधनको दर्तामा रोक लगाउने निर्णयसँगै देशभर कुनै पनि प्रकारका नयाँ सार्वजनिक सवारी साधन दर्ता नहुने बताइएकाे छ ।
