आज मुस्लिम धर्मावलम्बीहरुकाे महान् पर्व बकर इदकाे अवसरमा सरकारले देशभर सार्वजनिक बिदा दिएकाे छ । मुस्लिम धर्मावलम्बीहरुले दोस्रो महान् पर्व बकर इद (इदुल जोहा) मनाउनका लागि सरकारले सार्वजनिक बिदा दिएकाे हाे ।
मुस्लिम धर्मावलम्बीहरुकाे इदुल फित्र अर्थात् रमजान पर्वको ७०औँ दिनमा बकर इद मनाउने धार्मिक विधिअनुसार मुस्लिम समुदायले याे पर्व धुमधामका साथ मनाउने गरेकाे पाइन्छ । नेपाल लगायत विश्वका मुस्लिमहरुले आज नजिकैको मस्जिद वा इदगाहमा गई सामूहिक नमाज पढ्ने र नमाज पढिसकेपछि एकापसमा शुभकामना आदानप्रदान गरेर याे पर्व मनाउने गर्दछन् ।
हिजरी संवत्अनुसार १४३९ वर्ष पहिले अल्लाहको आदेशमा इब्राहिमले आफ्ना छोरा इस्माएल अलेह सलामलाई बलिदान गर्न तयार भएको सम्झनामा यो पर्व मनाउन थालिएको किंम्बदन्ती रहेको छ । यो पर्व एवं धर्मलाई पुस्तान्तर गर्न महत्त्वपूर्ण योगदान गर्दै हदिस नामक धर्मग्रन्थको रचना गरिएकाे र उक्त ग्रन्थलाई अहिले मुस्लिम धार्मिक विद्यालय (मदरसा)मा समेत अध्ययन अध्यापन गराइन्छ ।
इब्राहिमको वंशमा सन् ५७१ मा मक्कामा मोहम्मद सलल्ला जन्मिएकाे र मक्कामा जन्मिएका सलल्ला ५३ वर्षको उमेरपछि मदिनामा सरेको र त्यही सम्झनामा अहिले पनि साउदी अरबमा पर्ने यी दुवै तीर्थस्थलमा ठूलो मेला लाग्ने गरेको छ । यस पर्वका अवसरमा मक्कामदिना जान शुभ मानिएकाले नेपाल सरकारकाे गृह मन्त्रालयले आतेजाते विमान टिकटको व्यवस्था गरी हजयात्रा गराउने गरेको छ ।
आज काठमाडाैँस्थित दरबारमार्गमा रहेकाे नेपाली जामे मस्जिद, काश्मिरी मस्जिदलगायत देशभरका मस्जिद र इदगाहमा मुस्लिम धर्मावलम्बीको भीड लागेको छ । मुस्लिम धर्मावलम्बीले शनिबारसम्म यो पर्व मनाउँदै छन् ।
