काभ्रेपलाञ्चोक जिल्लाको १३ स्थानीय तहका ४७९ बस्ती उच्च जोखिममा रहेका छन् । मनसुनजन्य विपद्का जिल्लास्तरीय विपद् ब्यवस्थापन समितिको बैठकले ४७९ बस्ती जोखिममा रहेको सार्वजनिक गरिएको हो ।
बैठकमा सहायक प्रमुख जिल्ला अधिकारी भोलानाथ गुरागाईंले स्थानीय तहगत रुपमा बस्तीको जोखिमयुक्त प्रतिवेदन पेस गरेका थिए । गुरागाईंद्वारा प्रस्तुत गरिएको तथ्याङ्कअनुसार ४७९ बस्ती उच्च जोखिममा रहेकाे छ । जसमध्ये २०९ बस्ती खुला स्थानमा तथा १९२ बस्ती सुरक्षित स्थानमा र ८१ बस्तीमा उद्धारका लागि हेलिप्याडको समेत व्यवस्था गरिएको छ ।
बैठकमा धारणा राख्दै प्रमुख जिल्ला अधिकारी गोपालकुमार अधिकारीले उच्च जोखिममा रहेका बस्तीलाई तत्काल स्थानान्तरण गर्न नसकिने बताएका थिए । उनले भने, “हालको अवस्थामा स्थानान्तरण गर्न सकिँदैन, ती बस्तीलाई निगरानीमा राखेर विपद्ले क्षति पुर्याए, स्थानीय सुरक्षाकर्मीद्वारा ‘क्वीक रेस्पोन्स’ गर्नसम्म सकिन्छ ।”
त्यसैगरि जिल्लामा आवश्यक उद्धार सामग्री पर्याप्त नभएकाले स्थानीय तहलाई युवालक्षित विपद् प्रतिकार्यको तालिम दिन तथा विपद्पछि राहत उद्धारका लागि सकेसम्म आवश्यक सामग्री खरिद गरी तयारी अवस्थामा रहन अनुरोध गरिएको छ । समितिले स्थानीय तहका विपद् व्यवस्थापन समिति तथा जनप्रतिनिधि र सुरक्षाकर्मीको तथ्याङ्ख्याका आधारमा उक्त जनसङ्ख्या यसवर्षको मनसुनजन्य विपद्बाट प्रभावित हुनसक्ने प्रक्षेपण गरिएकाे हाे ।
यस वर्षको बाढीपहिराले जिल्लाका रोशी, सुनकोशी, इन्द्रावती, पुण्यमाता, झिकुखोला, दाप्चाखोलालगायत तटीय क्षेत्र आसपास बसोबास गर्ने नागरिक प्रभावित हुने अनुमान गरिएको र यसबाट सतर्कता अपनाउन आग्रह गर्दै आएकाे पनि प्रजिअ अधिकारीले बताए ।
काभ्रेका १३ वटै स्थानीय तह बाढीपहिराको उच्च जोखिममा रहेकाले समितिलाई स्थानीय तहद्वारा प्राप्त तथ्याङ्कअनुसार जिल्लामा सबैभन्दा बढी बेथानचोक गाउँपालिकामा करिब १०० बस्ती र सबैभन्दा कम चौँरी देउराली गाउँपालिकामा ५ बस्ती उच्च जोखिममा छन् ।
त्यसैगरि धुलिखेल नगरमा २५, बनेपा र नमोबुद्ध नगरमा ५०, पाँचखाल नगरमा ८३, पनौती नगरमा १५, मण्डनदेउपुर नगरमा १५ तथा तेमाल गाउँपालिकामा ३५, रोशी गाउँपालिकामा १२, भुम्लु गाउँपालिकामा ४०, खानीखोला गाउँपालिकामा ३० र महाभारत गाउँपालिकामा १९ परिवार विपद्को जोखिममा रहेका छन् ।
यसअघि २०८१ असोज १० गतेदेखि ३ दिन परेकाे अविरल वर्षाका कारण आएको बाढी पहिरामा परि काभ्रेपलाञ्चोकमा ७८ जनाको मृत्यु भएको थियो भने ६ जना बेपत्ता भएका थिए । कार्यालयका अनुसार उक्त घटनामा ७५ जना घाइते भएका थिए भने बाढी पहिरोमा मृत्यु हुनेमा सबैभन्दा बढी पनौती नगरका १७ जना थिए ।
त्यतिबेला काभ्रेको १३ स्थानीय तहमध्ये पाँचखाल, खानीखोला र महाभारतमा भने मानवीय क्षति हुन पाएन । काभ्रेपलाञ्चोकमा बाढीपहिरामा परी ३३ महिला, २९ पुरुष, ९ बालक र ७ बालिकाको मृत्यु भएको थियो ।
