एसीसी महिला प्रिमियर कपमा नेपालले कतारलाई ८ विकेटले हराएको छ । मलेसियाकाे क्वालालम्पुरमा भएकाे पहिलो खेलमा समूह डीमा रहेको नेपालले कतारलाई ८ विकेटले हराएको हो ।
टस हारेर पहिले ब्याटिङ गरेको कतार १६.५ ओभरमा ७६ रन बनाउँदै अल आउट भएको थियो । कतारको ७७ रनको लक्ष्य पछाएको नेपालले १० ओभर ५ बलमा २ विकेट गुमाउँदै लक्ष्य पूरा गरेकाे थियाे ।
नेपाललाई जित दिलाउन ओपनर ब्याटर बिन्दु रावलले ३० बलमा ४ चौका प्रहार गर्दै सर्वाधिक ३३ रन बनाउँदा दोस्रो विकेटका लागि पूजा महतो र बिन्दु रावलले ४१ रनको साझेदारी गरेका थिए । त्यस्तै पूजा महतो २८ रनमा अविजित रहँदा कप्तान इन्दु बर्मा ५ बलमा १ चौकासहित ६ रन बनाएर अविजित रहेकी थिइन् ।
उता कतारका लागि बलिङतर्फ साहिरिननवाब खान र खादिजा अहमदले १–१ विकेट लिएका थिए । त्यसअघि, ब्याटिङमा कतारको लागि ओपनर ब्याटर गीतरुड चान्दिरुले १९ बलमा दुई चौका र एक छक्का प्रहार गरि सर्वाधिक २५ रन बनाएकी थिइन् । पहिलो विकेटका लागि दुई ओपनरद्वय फातिमा मुकादमसँग उनले ३५ रनको साझेदारी गरेकी थिइन् । कप्तान आयशाले १० रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन् ।
नेपालको लागि बलिङतर्फ रुबिना क्षेत्रीले सर्वाधिक ३ विकेट लिइँदा कविता कुँवर, रिया शर्मा र पूजा महतोले १–१ विकेट लिएका थिए । अब नेपालले दोस्रो खेल भुटानसँग खेल्नेछ ।
