काठमाडौँ उपत्यकाका विभिन्न स्थानबाट चोरी भएर फेला परेका ४० वटा दुई पाङ्ग्रे सवारी साधन सम्बन्धित धनीलाई हस्तान्तरण गरिएकाे छ । काठमाडौँ उपत्यका ट्राफिक प्रहरी कार्यालयले हराएकाे सवारी साधन फेला पारि सम्बन्धित धनीलाई हस्तान्तरण गरेको हाे ।
आज कार्यालयमा आयोजित एक कार्यक्रमबीच कार्यालयका प्रमुख, प्रहरी वरिष्ठ उपरीक्षक नवराज अधिकारीले २५ वटा मोटरसाइकल र १५ वटा स्कुटर सम्बन्धित धनीलाई हस्तान्तरण गरेका हुन् ।
ट्राफिक प्रहरी कार्यालयमा प्राप्त निवेदन र अन्य माध्यमवाट आएका सूचनाका आधारमा खोजी गर्ने क्रममा केही वास्तविक नम्बर प्लेटमा र केही नक्कली नम्बर प्लेट राखेको अवस्थामा काठमाडौँ उपत्यकाका विभिन्न स्थानबाट उक्त सवारी साधन ट्राफिक प्रहरीले फेला पारेको थियो ।
हस्तान्तरण कार्यक्रममा कार्यालयका प्रमुख, प्रहरी वरिष्ठ उपरीक्षक नवराज अधिकारीले सवारी साधन चोरी तथा हराउनबाट रोक्न आफ्नो सवारी साधन सुरक्षित स्थानमा पार्किङ गरी लक गर्न सुुझाव दिएका थिए ।
उनले पछिल्ला दिनमा सवारी नियम उल्लंघनका घटना बढेको भन्दै मर्यादित र नियमको पालना गर्दै सवारी चलाउन पनि आग्रह गरेका छन् ।
