राष्ट्रिय स्वतन्त्र पार्टी (रास्वपा) काे बागमती प्रदेश सभापतिमा उत्सव अर्याल निर्वाचित भएका छन् । उनका प्रतिस्पर्धी अच्युतम लामिछानेलाई दुई मतले पराजित गर्दै अर्याल बागमती प्रदेश सभापतिमा निर्वाचित भएका हुन् ।
कडा प्रतिस्पर्धा भएकाे निर्वाचन मार्फत अर्यालले ४१६ मत ल्याए भने लामिछानेले ४१४ मत ल्याएका थिए । रास्वपाले नयाँ नेतृत्व चयनका लागि बागमती प्रदेशमा विद्युतीय उपकरणमार्फत मतदान गराएको थियाे ।
यसअघि प्रदेशको प्रवक्ता समेत रहेका नवनिर्वाचित सभापति अर्यालले नुवाकोट–२ नम्बर क्षेत्रका प्रतिनिधि सभा सदस्य तथा यसअघि बागमती प्रदेश सभापति समेत रहेका लामिछानेलाई पराजित गरेका हुन् ।
पहिलो चरणको निर्वाचनमा सभापति र सदस्य निर्वाचित भएका छन् भने दोस्रो चरणको निर्वाचनमा बाँकी पदाधिकारी छानिनेछन् । रास्वपाको विधानमा प्रदेश सभापतिमा निर्वाचित हुन ५१ प्रतिशत मत ल्याउनुपर्ने प्रावधान रहेकाे छ ।
रास्वपा बागमती प्रदेशमा चार जना सभापतिका आकांक्षी देखिए पनि अन्तिममा दुई जनाबीच प्रतिस्पर्धी भएकाे थियाे जसमा अर्यालले ५१ प्रतिशत मत ल्याएर सभापति निर्वाचित भएका हुन् ।
