उपल्लो वायुमण्डलमा रहेको पश्चिमी न्यून चापीय रेखा, स्थानीय वायु तथा पूर्वीय वायुको प्रभावका कारण देशका विभिन्न भागमा मेघगर्जन र चट्याङसहित मध्यमसम्मको वर्षा भइरहेको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार कोशी, बागमती, गण्डकी र लुम्बिनी प्रदेशका हिमाली र पहाडी भू–भागका थोरै स्थान तथा कर्णाली प्रदेशको एक–दुई स्थानमा मेघगर्जन र चट्याङसहित मध्यमसम्मको वर्षा भइरहेको बताइएकाे छ । हिमाली र पहाडी भू–भागका साथै मधेस, बागमती, गण्डकी र लुम्बिनी प्रदेशका तराईमा आंशिक बादल लाग्नुका साथै बाँकी तराई भू–भागकाे मौसम मुख्यतया सफा रहेकाे छ ।
आज दिउँसो हिमाली भू–भाग र कोशी प्रदेशको पहाडी भू–भागमा साधारणतया बादल लाग्ने छ भने देशको पहाडी भू–भागमा तथा कोशी, मधेस, बागमती र गण्डकी प्रदेशका तराई भू–भागमा आंशिक बादल लाग्नुका साथै लुम्बिनी र सुदूरपश्चिम प्रदेशको तराई भू–भागमा मौसम मुख्यतया सफा रहनेछ ।
आज राति कोशी, मधेस, बागमती र गण्डकी प्रदेशमा आंशिक बादल लाग्ने छ। त्यस्तै लुम्बिनी, कर्णाली, कोशी, र सुदूरपश्चिम प्रदेशको हिमाली र पहाडी भू–भागमा आंशिक बादल लाग्नुका साथै लुम्बिनी र सुदूरपश्चिम प्रदेशको तराई भू–भागकाे मौसम मुख्यतया सफा रहनेछ ।
