राष्ट्रिय स्वतन्त्र पार्टी (रास्वपा)को प्रथम महाधिवेशनबाट उपसभापति पदमा स्वर्णिम वाग्ले निर्विरोध निर्वाचित भएका छन् । केन्द्रीय सदस्य पदका लागि भएकाे निर्वाचनमा सबैभन्दा बढी मत ल्याएका डा. स्वर्णिम वाग्लेले उपसभापति पदमा निर्विरोध निर्वाचित भएका हुन् ।
पुरुषतर्फ उपसभापति पदका लागि उम्मेदवारी दिएका विराजभक्त श्रेष्ठले आफ्नो दाबी फिर्ता लिएपछि वाग्ले निर्विरोध भएका थिए भने श्रेष्ठ वाग्लेको प्रस्तावकसमेत बनेका छन् । पार्टी विधानअनुसार एक सभापति, महिलासहित दुई उपसभापति, एक महामन्त्री र तीन सहमहामन्त्री पदका लागि निर्वाचन हुने व्यवस्था रहेकाे छ ।
पार्टीको केन्द्रीय निर्वाचन आयोगले दिएको पछिल्लो जानकारी अनुसार केन्द्रिय सदस्यका लागि भएकाे निर्वाचनमा डा. स्वर्णिम वाग्लेले खुलातर्फ २,६०७ मत प्राप्त गरेका थिए भने प्रवास (डायस्पोरा)का प्रतिनिधिहरूबाट थप ४९ मत प्राप्त गरेका थिए ।
यसअघि राष्ट्रिय स्वतन्त्र पार्टी (रास्वपा)को सभापति पदमा रवि लामिछाने निर्विरोध निर्वाचित भइसकेका छन् ।
