अंगीकृत नेपाली नागरिकताका लागि झुठाे विवरणका आधारमा सिफारिस दिने दुई जना जनप्रतिनिधि पक्राउ परेका छन् । मोरङको रंगेली नगरपालिका-५, का वडाध्यक्ष र वडासदस्य पक्राउ परेका हुन् ।
सिफारिस गरेको आरोपमा प्रहरीले रंगेली नगरपालिका-५ का वडाध्यक्ष महानन्द मण्डल र सोही वडाका सदस्य गणेश ऋषिदेवलाई पक्राउ गरेको हो । प्रशासनको निर्देशनमा दुवैलाई पक्राउ गरेको मोरङ प्रहरीका सूचना अधिकारी एवं डीएसपी मकेन्द्रकुमार मिश्रले जनाएका छन् ।
मनुवाकुमार महतो नाम गरेका व्यक्तिले अधनुनिया महतो नामकी महिलालाई नक्कली आमा बनाई अंगीकृत नागरिकताका लागि आवेदन दिएका थिए । वडाध्यक्ष मण्डल र वडा सदस्य ऋषिदेवले आवेदनका लागि आवश्यक पर्ने सर्जमिन मुचुल्का र सिफारिस उपलब्ध गराएको प्रशासनको अनुसन्धानबाट खुलेको छ ।
नक्कली आमा देखाएर नागरिकता लिन खोज्ने मनुवाकुमार महतो भने फरार भएका छन् ।
